Faritra Androy

Ny Faritra Androy dia iray amin' ireo faritra 23 eto Madagasikara. Ao amin' ny Faritanin' i Toliara ao atsimon' ny Nosy no misy azy. Ambovombe ny renivohiny. Manana velaran-tany mirefy 19 317 km² io faritra io. Saro-dalana izy sady maina tsy ampy rano. Ny vahoaka antandroy no mponina betsaka ao. Ny isamn' ny -onina dia 903. 76 tamin'n y taona 2018.A vy amin' ny anaran' ny zavamaniry hoe roy ny anaran' io faritra io.

Ireto ireo distrika efatra mandrafitra ny Faritra Androy:

• Distrikan' Ambovombe
• Distrikan' i Bekily
• Distrikan' i Beloha
• Distrikan' i Tsiombe

Jeôgrafia

Toerana misy azy

Toerana misy ny Faritra Androy

Any amin' ny farany atsimo amin' i Madagasikara no misy ny Faritra Androy izay manana velarana 19 350 km². Ny hakitroky ny mponina dia 13 mp/km². Ny tanin’ ny Bara no mamaritra azy avy ao avaratra, ny Ranomasimbe Indianina sy ny Lakandranon' i Môzambika ny ao atsimo, ny Faritra Anosy no ao atsinanana sy avaratra ary ny Faritra Atsimo-Andrefana no ao andrefana.

Taloha dia tao amin’ ny Faritany Mizaka Tenan’ i Toliara ny Faritra Androy. Ahitana distrika efatra (Ambovombe, Tsihombe, Bekily ary Beloha) sy kaominina 51 ary fokontany 881 ny ao aminy.

Toetany

Voasokajy ao anatin’ ny faritra maina maina eto Madagasikara ny Faritra Androy, izay manana amin’ ny rotsak' orana 400 mm eo ho eo isan-taona ary sala-maripana 28 °C. Mihena be ny rotsak' orana avy amin' ny faritra avaratra mianatsimo any amin’ ny morontsiraka. Tsy marin-toerana ny rotsak' orana, ary ny elanelan-kafana dia miovaova sady lehibe ka matetika mahatonga ny fahasimban’ ny tany efa karankaina. Misy fiantraikany mivantana amin' ny asa fiveloman’ ny mponina izany.

Ny vanin-taona mafana dia eo anelanelan' ny Ôktôbra sy Avrily ary 24 °C ny sala-maripana isam-bolana, ka ny volana Janoary no manana maripana ambony indrindra. Ny vanim-potoana mangatsiaka dia ny volana Mey hatramin' ny Septambra izay manana maripana 19 °C mandritra ny volana Jona sy Jolay. Ny hain-tany dia misy fiovaovana mitsigerina isaky ny valo ka hatramin' ny folo taona. Iharan’ ny rivotra mahery sy maina avy any atsimo, atao hoe  Tiokatimo ny Faritra Androy.

Rano sy tambajotran-drano

Renirano telo lehibe no mandrafitra ny tambajotran-drano, dia i Mandrare ao amin’ ny tapany avaratra amin’ ny Distrikan' Ambovombe, i Manambovo ao amin’ ny Distrikan' i Tsihombe, i Menarandra ao amin’ ny Distrikan' i Bekily sy ao amin’ ny Distrikan' i Beloha. Tsy maharitra anefa ireo renirano ireo ary misy ny vanim-potoana maha kely ny rano ao aminy mandritra ny fotoana maharitra amin’ ny main-tany, amin' ny Avrily ka hatramin' ny Septambra. Izany toe-javatra izany no mahatonga ny olana eo amin’ ny fahazoana rano any Androy.

Sady tsy ampy ny rano no maloto ka tsy mendrika hosotroin’ olombelona. Ny rano avy amin' ny lava-drano dia somary masira noho ny fandrosoan' ny rano sira avy amin’ ny ranomasina, ka ny biby fiompy no sahaza azy. Misy fiantraika ny ratsy amin’ ny tany anirian-kazo sy tany fambolena izany noho ny rano masira, ka mampitombo ny olan’ ny tsy fahampian-tsakafo.

Toekarena sy sôsialy

Ny Faritra Androy dia ahitana tetikasa maro isan-karazany sy mpamatsy vola maro, nanao tetikasa hanalefahana ny fiantraikan’ ny hain-tany, nefa ny ankamaroan’ ireo dia tsy mahomby, noho ny hakelin’ ny fandraisana anjaran' ny mponina amin' ny famolavolana sy fanatanterahana izany tetikasa izany.

Jereo koa

• Faritany sy faritra eto Madagasikara: Faritanin' Antananarivo (Faritra Itasy - Analamanga - Bongolava - Vakinankaratra) - Faritanin' Antsiranana (Faritra Diana - Sava) - Faritanin' i Fianarantsoa (Faritra Atsimo-Atsinanana - Amoron'i Mania - Ihorombe - Matsiatra Ambony - Vatovavy-Fitovinany) - Faritanin' i Mahajanga (Faritra Boeny - Betsiboka - Melaky - Sofia) - Faritanin' i Toamasina (Faritra Alaotra-Mangoro - Analanjirofo - Atsinanana) - Faritanin' i Toliara (Faritra Atsimo-Andrefana - Anosy - Androy - Menabe)
• Antandroy