Toekaren' i Okraina

Ny toekaren' i Okraina dia miompana amin' ny fambolena sy ny fitrandrahana harena an-kibon' ny tany. Hatramin' ny nahazoany ny fahaleovan-tenany anefa dia niaina fahasahiranana ara-toekarena lehibe i Okraina. Teo amin' ny seha-pihariana rehetra eo amin' ny toekarena dia nahitana fihenan' ny famokarana, indrindra ny seha-pihariana faharoa. Imbetsaka i Okraina no tsy nahazo fanampiana avy amin' ny Tahirim-Bola Iraisam-Pirenena sy tamin' ny Banky Iraisam-Pirenena. Tamin' ny taona 2003 dia 19,5 %n' ny mponina no miaina ambanin' ny tokonam-pahantrana.

Seha-pihariana voalohany

Fambolena

Tanim-boaloboka any amin' ny Ôblastan' i Zakarpattia

Nianjadian' ny fahasahiranana mafy ny famokarana ara-pambolena taorian' ny fahaleovantena sy noho ny fahatapahan' ny fifandraisana ara-toekarena sy ara-barotra tamin' ireo repoblika tao amin' ny Firaisana Sôvietika taloha. Nikorosy fahana ny fambolena. Nihena izaitsizy ny famokarana voamadinika any Okraina. Ny 57,6 % amin' ny tanin' i Okraina no voavoly ka mahatonga azy ho firenena manan-karena amin' ny fambolena. Isan' ireo firenena mpamokatra ovy, betiravy fanaovan-tsiramamy ary vary orza i Okraina. Ny vokatra hafa dia ny varimbazaha, ny katsaka, ny sôja, ny legioma, ny tanamasoandro ary ny rongonimbazaha. Mamokatra divay sy voankazo koa ny any Krimea (izay efa lasan' ny Rosiana nanomboka tamin' ny volana Marsa 2014).

Fiompiana

Mitana anjara toerana lehibe any Okraina koa ny fiompiana, indrindra ny fiompiana kisoa sy omby. Ny sehatry ny fiompiana dia niharan' ny fatiantoka lehibe nanomboka tamin' ny taona 1990, indrindra noho ny fanakatonana ny tsena rosiana, ny tsy fisian' ny tsena anatiny mafy orina, ary ny tsy fandrindrana ilay sehatra izay nitarika famonoana biby maro. Na izany aza, nanomboka tamin' izany fotoana izany dia tsy nahitana afa-tsy fitomboana antonony fotsiny ilay sehatra, anisan' izany ny famokarana ronono. Tsy misy afa-tsy ny fiompiana akoho amam-borona sy kisoa no nitombo be.

Taozavabaventy sy harena an-kibon' ny tany

Sahanin' ny 24,2 % amin' ny mponina miasa any Okraina ny seha-pihariana faharoa.

Harena an-kibon' ny tany

Anisan' ny firenena mpamokatra manganezy, arintany, tsỳ ary vy betsaka eran-tany i Okraina. Ny harena an-kibon' ny tany izay hita amin' ny tany midadasika ao Okraina no kitro ifaharan' ny taozava-baventy any aminy. Taloha dia namokatra ny ampahatelon' ny akoran-tsỳ sy akoram-by ary akora simika ho an' ny Firaisana Sôvietika i Okraina.

Taozavabaventy

Fiara fitateram-bahoaka Electron E19101, mandeha amin' ny herinaratra, vita tao Lviv

Ao Donbass, akaikin' ny toeram-pitrandrahana harena an-kibon' ny tany, no misy ny foiben' ny taozavabaventy any Okraina. Ankehitriny dia mamokatra milina mavesatra, vokatra simika, fitaovam-pitaterana (indrindra ny fiarakodia), lamba ary vokatra sakafo i Okraina.

Mifototra amin' ny arintany sy ny angovo nokleary ny famokarana angovo. Miankina be amin' i Rosia sy i Torkmenistàna ny toekarena okrainiana raha momba ny solitany sy ny etona voajanahary. Ny tsy fahampian' ny angovo no nahatonga an' i Okraina mampiasa toby nokleary dimy, anisan' izany i Chernobyl na Tchernobyl.

Seha-pihariana fahatelo

Fizahan-tany

Katedraly Md Misely ao Kyiv, mahasitona mpizaha tany

Mpizaha tany rosiana sy pôlôney maro no mandeha any Krimea mba hahazo fahafinaretana amin' ny fandroana amoron-dranomasina, ka fidiram-bola lehibe ho an' i Okraina izany talohan' ny taona 2014. Ao koa ireo mankany Kyiv (na Kiev), izay renivohitra manan-tantaran' ny fanjakana rosiana voalohany.

Torapasika ao Yalta, mahasintona mpizaha tany

Varotra

Tamin' ny voalohany dia nampiasa vola vonjimaika atao hoe karbovanets, izay navoaka tamin' ny Nôvambra 1992 i Okraina, nasolo ny robla rosiana. Tamin' ny Septambra 1996, ny hryvnia, izay azo zaraina ho kopiyka 100, no naparitaka.

Ny firenena tena mpiara-miombona antoka ara-barotra amin' i Okraina dia i Rosia, i Alemaina, i Torkia, i Torkmenistàna ary i Italia.

Fitaterana

Ampiasaina betsaka amin' ny fitaterana any Okraina ny fiaran-dalamby

I Okraina dia manana tambajotram-pitaterana efa mandroso tsara, ahitana lalana mirefy 169 495 km izay ny ankabetsahany ratsy, nolovaina tamin' ny vanim-potoana sôvietika, sy lalamby mirefy 21 658 km, ary halavan' ny lalana an-drano 2 155 km misokatra ho an' ny fifamoivoizana.

Fiaramanidina Boeing 737 ampiasain' ny orinasam-pitaterana any Okraina

Ny seranam-piaramanidina lehibe indrindra ao Okraina dia i Kyiv-Boryspil, i Kyiv Jouliany, i Lviv, i Donetsk, i Odessa ary i Simferopol. Tamin' ny taona 2012, nisy fotodrafitrasa 412 ny seranam-piaramanidina.

Ny seranan-tsambon' i Odessa ao amin' ny Ranomasina Mainty

Seranan-tsambo ara-barotra 18 no voaisa tamin' ny taona 2013 teo amin' ny morontsiraka manamorona ny Ranomasina Mainty sy ny Ranomasin' i Azov. Tamin' ny taona 2008, nitondra entana 132,18 tapitrisa taonina izy ireo. Ny serana-tsambo lehibe indrindra dia ny an' i Odessa, any amin' ny Ranomasina Mainty.

Ity firenena ity dia manana tambajotra fantson-tsolika sy fantson' etona lava dia lava, izay mitatitra ny solitany sy etona voajanahary rosiana any aminy sy any Eorôpa Andrefana. Hatramin' ny tapaky ny taompolo 2000, ireo fotodrafitrasa ireo no ivon' ny fifandonana eo amin' i Okraina sy i Rosia.