Voamadinika

Ny voamadinika dia zavamaniry toy ny ahitra fihinam-boa. Anisan' ny fianakaviana graminea ny ankamaroany. Ny voamadinika fahita indrindra dia ny varimbazaha, ny ôrza, ny ampembambazaha, ny katsaka, ny vary, ampemba. Ny voamadinika no miantoka ny ampahany be amin' ny sakafon' ny mponina eran-tany. Ny voany dia tena misy "siramamy miadam-piasa" (gliosida saro-drafitra): anelanelan' ny 60 sy 85 %. Hanina masaka nahandroina mivantana, na nototoina ho lafarinina (vary, ôrza, varimbazaha, sns.) alohan' ny hamavadihana azy ho mofo, na paty. Ny voany sy ny tahony ary ny raviny dia ampiasaina hohanin' ny biby fiompy. Ny voan' ny voamadinika sasany dia azo ampiasaina amin' ny fanaovana toaka (ny ankamaroan' ny labiera, ohatra, dia azo avy amin' ny fanotrehana ny ôrza).

Ny voamadinika dia anisan' ny zavamaniry novolen' ny olombelona voalohany, nandritra ny Neôlitika, 10 000 hatramin' ny 12 000 taona lasa izay. Ny varimbazaha dia avy any Azia Minora, ny vary avy any Azia sy Afrika; ny katsaka no hany voamadinika teratany any Amerika. Amin' izao fotoana izao, ny voamadinika rehetra dia ambolena manerana izao tontolo izao.

Ny ankamaroan' ny voamadinika dia ao amin' ny fianakaviana Gramineae. Ny varimbazaha dia atsoina amin’ ny anarana siantifika hoe Triticum, ny ôrza Hordeum ny segla Secale, ny avoanina Avena, ny vary Oryza ary ny katsaka Zea. Ny ampembambazaha sy ny mitovitovy aminy dia mizara ao amin' ny Setatia, ny Eleusine, ny Panicum ary ny Pennisetum; ny ampemba dia ao amin' ny Sorghum sy Andropogon. Ny sarase dia Polygonaceae ao amin' ny karazana Polygonum.