Hanokatra ny renilisitra
Ny evan'ny Alahamady

Ny Alahamady no vintana voalohany ao amin'ny fanandroana manaraka ny zodiaka. Ny Alohotsy no eo alohany ary ny Adaoro no manaraka azy.

Ao amin'ny fanandroana malagasy dia vintana voalohany koa ny Alahamady ka ny zoro avaratra-atsinana amin'ny trano no toerana omena azy. Io zoro io dia atao hoe zorofirarazana koa. Misy amin'ny Malagasy ny mandray ny volana Alahamady ho volana voalohany amin'ny taona ao amin'ny tetiandro malagasy.

Votoatiny

Fiavian'ilay anaranaHanova

 
Ondrilahy

Ny teny hoe Alahamady dia avy amin'ny anaran'ny antokon-kintana amin'ny teny arabo hoe االحمل / Al-Hamal izay midika hoe "ondrilahy". Amin'ny faritra maro eto Madagasikara dia tononina manakaiky kokoa ny teny arabo izy ka atao hoe Alahamaly.

Manondro ny antokon-kintana sy ny evan'ny zodiaka atao amin'ny teny latina sy anglisy hoe Aries na amin'ny teny frantsay hoe Bélier ny hoe Alahamady. Amin'ny fiteny soahily dia atao hoe Hamal na Kondoo io antokon-kintana io. Amin'ny teny maley kosa dia atao hoe Hamal na Biri-biri ihany koa izy.

Ny antokon-kintana Alahamady sy ny zodiakaHanova

 
Ny antokon-kintan'ny Alahamady na Ondrilahy

Ny fotoana andalovan'ny masoandro ao amin'ny fari-danitry ny antokon-kintan'ny Alahamady dia manomboka amin'ny 18 Avrily ka miafara amin'ny 13 Mey. Ny fari-potoan'ny Alahamady araka ny zodiakan-kintana (frantsay: zodiaque sidéral) dia eo amin'ny 15 Avrily hatriamin'ny 15 Mey.

Ny Alahamady ao amin'ny zodiaka mikisaka (frantsay: zodiaque tropique) dia eo anelanelan'ny 21 Marsa sy 20 Avrily: tsy mifanaraka amin'ny fotoana andalovan'ny masoandro tandrify ny antokon-kintana Alahamady izany.

Ny volana Alahamady ao amin'ny tetiandro malagasy kosa dia tsy mifanaraka amin'ireo fa miandry tsinam-bolana ka misy milaza fa ny tsinam-bolana manakaiky indrindra ny 21 Marsa ao amin'ny volana Marsa na Avrily izany. Raha manara-bolana tanteraka anefa ny tetiandro malagasy dia tsy voatery ho marina izany.

Alohotsy Alahamady Adaoro
Antokon-kintana 11 Marsa - 18 Avrily 18 Avrily - 13 Mey 13 Mey - 21 Jona
Zodiakan-kintana 15 Marsa - 14 Avrily 15 Avrily - 15 Mey 16 Mey - 15 Jona
Zodiaka mikisaka 20 Febroary - 20 Marsa 21 Marsa - 20 Avrily 21 Avrily - 20 Mey

Ny Alahamady amin'ny MalagasyHanova

Amin'ny Malagasy dia anaram-bintana aloha ny Alahamady vao izay anaram-bolana sy zavatra hafa (zoro, biby, habaka, erana sns). Renivintana na renim-bintana ny Alahamady.

Anaram-bolanaHanova

Araka ny lovantsofina, tamin'ny voalohan'ny taonjato faha-16, rehefa tafakatra taty anivon'ny riaka, tao Ambohidrabiby, ny lehilahy iray atao hoe Rabiby, izay lasa mpanjaka malaza tamin'ny fanandroana, ary nandresy ireo Vazimba teo amin'ny manodidina an'Ambohidrabiby, dia novainy ho amin'ny teny arabo ny anaram-bolana 12 izay tamin'ny teny maley sy vazimba teo aloha. Rabiby sy ny fahaizany mitety andro moa dia voatazon'ny fitenenana manao hoe: "Aza milaza mahita volana alohan-dRabiby".

Anaram-bintanaHanova

RenivintanaHanova

Entina hilazana vintana ny teny hoe Alahamady ka iray amin'ireo renivintana efatra amin'ny fanandroana malagasy izy.

Zavatra itovizan'ny Alahamady amin'ny vintana hafa

Ny volana 12 dia samy manana ny vintany avy, izany hoe zanabintana ny volana 8 amin'izany. 29 na 30 andro ny volana iray tamin'ny fanisana andro malagasy nefa amin'ny fanandroana malagasy dia tsorina ho 28 izany isa izany.

Ny andro iray (atao hoe "tonon'andro") dia mitondra anaram-bolana/vintana roa dia ny anaran'ny volana diavina sy ny anaram-bintana iray hafa (zanabintana). Raha Alahamady (renivintana) ny volana diavina ka Alohotsy no zanabitana dia Alahamady-Alohotsy no vintan'ilay olona. Fa misy kosa olona sady teraka tamin'ny volana Alahamady no mbola zanabitana (vava) Alahamady, toa an-dRalambo sy Andriamasinavalona ary Andrianampoinimerina izany, araka ny lovantsofina.

Vintana tsara indrindraHanova

Ny volana Alahamady, hono, no vintana tsara indrindra satria ny olona teraka eo dia natao hitondra fanjakana. Ralambo zafikelin-dRabiby dia teraka ny vava Alahamady koa lasany ny fanjakana. Tamin-dRabiby dia voalohan'ny volana amin'ny volana 12 ny volana Alahamady.

Volana natokana ho an'ny fandroanaHanova

Tato aoriana, mba ho fahatsiarovana ny andro nahaterahany dia nataon-dRalambo amin'ny volana Alahamady ny fandroan'andriana ka Alahamadibe no iantsoana io andro iray amin'ny volana Alahamady io. Tamin'izany dia lasa fomba fiheverana fa io fitsingeranan'ny andro nahaterahan-dRalambo io no lasa tonon-taona sy noheverina ho toy ny voalohan'ny taona na "asaramanitra". Tamin-dRalambo dia nifanindry ny Alahamadibe sy ny fandroan'andriana ary ny asaramanitra.

Fanovana taty aorianaHanova

Nandritry ny taonjato faha-19, dia nisy mpanjaka nanova ny andro fanaovana ny fandroan'andriana ho amin'ny andro nahaterahany ka tsy nifanindry intsony nanomboka teo ny volana Alahamady sy ny fandroan'andriana ary ny asaramanitra.

Anaran'ny zoro avaratra-atsinanaHanova

Zoro masina indrindraHanova

Ny hoe Alahamady dia ilazana ny zoro avaratra-atsinana teo amin'ny Ntaolo malagasy. Zoro saro-pady sy masina indrindra ny Alahamady satria eo no itodihana raha mivavaka amin' Andriananahary sy ny razana ary eo no apetraka ireo zava-masina rehetra. Ny zoro Alahamady no zoro firarazana. Ary izany no maha loham-bitana sy volana voalohany ny Alahamady amin'ny faritra sasany teto Madagasikara.

Fahatsiarovan-dRabiby ny razanyHanova

Araka ny lovantsofina dia ny mpanjaka Rabiby hatrany no nametraka ny Alahamady ho eo amin'ny zoro avaratra-atsinanana mba ho fahatsiarovany fa avy any Maka (frantsay: La Mecque), any avaratra atsinanan'i Madagasikara ireo razana niandohany ka nomeny lanjany manokana io zoro io raha Ambohidrabiby, vohitra misy azy no jerena. Eo amin'ny Alahamadintanin'Ambohidrabiby, amin'ilay tanàna atao hoe Fonohasina no nanao joro sy nangata-pitahiana Rabiby alohan'ny hanafihany ny Vazimba teo an-tampon'Ambohidrabiby, koa napetrany amin'io toerana io ny hasin'ny fanjakany ary izany hasina mipetraka ao Fonohasina izany no maha-hasin'Imerina ny vohitr'Ambohidrabiby.

Vavahady fidiran'andriana sy zoro fandroan'andrianaHanova

Mbola ny vavahady Alahamady amin'ny vohitr'Ambohidrabiby no natokana hidiran-dRabiby sy ny taranany, fa ny andriana hono tsy mba miditra amin'ny vavahady atsimo amin'ny vohitra iray. Tamin-dRalambo dia mbola nolalainy fatratra ny zoro Alahamady, manamarina izany, ao ambany avaratra-antsinana amin'ny vohitr'Ambohidrabiby no antsakaina ny rano ampiasain-dRalambo amin'ny sakafony sy hisasany; ao anatin'ny lapa, amin'ny zoro Alahamady no manao ny fandroana Ralambo ary mbola ao Fonohasina amin'ny zoron'Alahamadin'Ambohidrabiby no nampitoeriny ireo zanak'andriana teo Ambohidrabiby atao hoe Andriandoriamanjaka.

Raha mbola tsy nanjaka Andrianampoinimerina dia efa naminany ny amin'ny hanjakany ny mpanjaka Andriambelomasina ka hoy izy hoe: "Ilay ilahifotsy avy amin'ny alahamadintany no tompon'ny farany", kanjo tokoa Andrianampoinimerina sady fotsy marirana izy no avy any Ikaloy izay alahamadintanin' Ambohimanga.

Oviana marina ny volana Alahamady?Hanova

Mizara roa ny hevitry ny Malagasy ny amin'ny fomba famaritana ny volana Alahamady sy ny volana sisa rehetra. Izy roa ireo dia samy miaiky fa tsinam-bolana ny andro voalohany amin'io volana io, dia ilay atao hoe vava Alahamady, sahala amin'ny volana malagasy iraika ambin'ny folo sisa rehetra. Tsy mifanaraka kosa izy ireo ny amin'ny fomba famaritana io volana io.

Amin'ny fararano?Hanova

Ny Trano Koltoraly Malagasy sy ny fikambanana hafa mitovy hevitra aminy dia milaza fa ny tsinam-bolana manakaiky indrindra ny daty gregoriana 21 Marsa no anombohan'ny volana Alahamady ka raha tsy amin'ny volana Marsa izany dia amin'ny volana Avrily, izany hoe amin'ny fizaran-taona fararano. Midika izany fa tsy manara-bolana tanteraka ny tetiandro malagasy arahin'io fikambanana io fa manara-masoandro koa (sahala amin'ny tetiandro hebreo). Milaza ny mpanohana io hevitra io fa fotoana manakaiky indrindra ny fidiran'ny masoandro manandrify ny antokon-kintana Alahamady izany, nefa ny haikintana amin'izao fotoana izao dia tsy manamarina izany tanteraka.

Miovaova fizaran-taona?Hanova

Ny Malagasy hafa, izay mandray ara-bakiteny ny maha manara-bolana tanteraka ny tetiandro malagasy (sahala amin'ny tetiandro miozolmàna), dia milaza fa tsy raikitra amin'ny volana Marsa na Avrily ny fiantombohan'ny volana Alahamady fa miovaova sady mitety ny volana gregoriana rehetra sy ny fizaran-taona rehetra ka tsy tafaverina ny fifanandrifiana amin'ny daty gregoriana iray raha tsy afaka 33 taona gregoriana na 34 taona malagasy. Ny iray taona malagasy dia misy 354 na 355 andro nefa ny iray taona gregoriana misy 365 na 366 andro. Isan'ny momba ity hevitra faharoa ity ilay mpamokatra ny "Alimanaka malagasy", dia i Arima Rabesata.

Jereo koa:Hanova