Adaoro
Ny Adaoro no vintana faharoa ao amin' ny fanandroana malagasy. Ny Alahamady no eo alohany ary ny Adizaoza no manaraka azy. Ny tapany avaratra amin' ny rindrin-trano atsinanana no toerana omena azy[1]. Lazaina fa mifandratra amin' ny Alakarabo sady mihataka sy miarina eo amin' ny Adimizana ny Adaoro.
Fiavian' ilay anarana Hanova
Ny teny hoe Adaoro Hanova
Avy amin' ny anaran' antokon-kintan' ny zôdiaka amin' ny teny arabo hoe اثور / Ath-Thur na Ath-Thaur ("ombilahy") ny hoe Adaoro. Manondro ny antokon-kintana atao amin'ny teny latina sy anglisy hoe Taurus na amin' ny teny frantsay hoe Taureau ny hoe Adaoro. Amin' ny teny soahily izy dia atao hoe Ng'ombe fa amin' ny teny maley kosa dia Lembu Jantan na Kerbau Jantan.
Ny antokon-kintana Ombilahy sy ny zôdiaka Hanova
Ny fotoana andalovan' ny masoandro ao amin' ny fari-danitry ny antokon-kintan'ny Ombilahy dia amin' ny 13 Mey hatramin' ny 21 Jona. Ny fari-potoan' ny Ombilahy araka ny zôdiakan-kintana dia eo amin' ny 16 Mey hatramin' ny 15 Jona. Ny Ombilahy ao amin' ny zôdiaka mikisaka dia avy eo amin' ny 21 Mey ka miafara amin' ny 20 Jona. Ny fanandroana malagasy dia tsy mifanaraka amin' ireo noho izy miandry tsinam-bolana.
| Ondrilahy | Ombilahy | Kambana | |
| Antokon-kintana | 18 Avrily - 13 Mey | 13 Mey - 21 Jona | 21 Jona - 20 Jolay |
| Zodiakan-kintana | 15 Avrily - 15 Mey | 16 Mey - 15 Jona | 16 Jona - 15 Jolay |
| Zodiaka mikisaka | 21 Marsa - 20 Avrily | 21 Avrily - 20 Mey | 21 Mey - 21 Jona |
Vintana Adaoro Hanova
Toerany Hanova
Ao amin' ny fanandroana malagasy dia vintana faharoa ny Adaoro ka ny tapany avaratra amin' ny rindrin-trano atsinanana no toerana omena azy. Zanabintana ny Adaoro. Trotroin' ny renivintana Alahamady ny zanabintana Adaoro. Mitondra tonon' andro roa ny Adaoro, dia ny vava Adaoro (na vavan' Adaoro) sy ny vody Adaoro (na vodin' Adaoro).
Fombany Hanova
Inoana ho andron' afo na andro mandoro ny Adaoro. Mifandratra amin' ny Alakarabo sady mihataka miarina eo amin' ny Adimizana ny Adaoro.
Vava Adaoro Hanova
Ny olona teraka vava Adaoro dia atahorana amin' ny afo ka tsy maintsy alam-bintana amin' ny alalan'ny fitondran-dreniny azy mandositra avy anaty trano tomboka kely nodorana.
Vody Adaoro Hanova
Ny olona teraka vody Adaoro dia tsara vintana ka raha lahy dia hahay mikabary fa raha vavy kosa dia ho tsara fanahy.
Volana Adaoro Hanova
Misy amin' ny Malagasy ny mandray ny volana Adaoro ho volana faharoa amin' ny taona ao amin' ny tetiandro malagasy (raha ny Alahamady no ataony volana voalohany).
Manomboka amin' ny vava Adaoro ka miafara amin' ny vody Alahamady ny volana Adaoro raha misy 28 andro. Raha tsy tsinanam-bolana ny andro aorian' ny vody Alahamady dia miafara amin' ny vava Adaoro ny volana Adaoro izay misy 29 andro; raha mbola tsy tsinana aorian' io vava Adaoro io dia mifarana amin' ny vody Adaoro ny volana izay misy 30 andro.
Jereo koa Hanova
Vintana ao amin' ny fanandroana malagasy:
- Alahamady - Adaoro - Adizaoza - Asorotany - Alahasaty - Asombola - Adimizana - Alakarabo - Alakaosy - Adijady - Adalo - Alohotsy
Evan' ny zôdiaka:
- Ondrilahy - Ombilahy - Kambana - Foza - Liona - Virijiny - Mizana - Maingoka - Mpitifitra Tsipìka - Tandrok' Osy - Mpitondra Rano - Hazandrano
Antokon-kintan' ny zôdiaka:
- Ondrilahy - Ombilahy - Kambana - Foza - Liona - Virijiny - Mizana - Maingoka - Bibilava - Mpitifitra Tsipìka - Tandrok' Osy - Mpitondra Rano - Hazandrano
Tetiandro
Loharano sy fanamarihana Hanova
- ↑ "Adaoro", ao amin'ny Rakibolana malagasy sy Rakipahalalàna momba an'i Madagasikara.