Asorotany
Ny Asorotany no vintana fahefatra ao amin'ny fanandroana manaraka ny zodiaka sy ao amin'ny fanandroana malagasy manara-bolana. Ny Adizaoza no eo alohany ary ny Alahasaty no manaraka azy. Anaran'ny zana-pehintany avaratra ny Asorotany.
Fiavian'ilay anaranaHanova
Avy amin'ny anaran'antokon-kintan'ny zodiaka amin'ny teny arabo hoe اسرطان / As-Saratan na As-Sartan ("foza") ny hoe Asorotany. Amin'ny faritra sasany eto Madagasikara dia atao hoe Asaratà na Saratà io teny io.
Manondro ny antokon-kintana atao amin'ny teny latina sy anglisy ary amin'ny teny frantsay hoe Cancer ny hoe Asorotany. Amin'ny fiteny soahily dia atao hoe Saratani io antokon-kintana io. Amin'ny teny maley dia atao hoe Sartan na Ketam ihany koa izy.
Ny antokon-kintana Asorotany sy ny zodiakaHanova
Ny fotoana andalovan'ny masoandro eo amin'ny antokon-kintan'ny Asorotany dia amin'ny 20 Jolay hatramin'ny 10 Aogositra. Ny fari-potoan'ny Asorotany araka ny zodiakan-kintana dia eo amin'ny 16 Jolay hatramin'ny 15 Aogositra. Ny Asorotany ao amin'ny zodiakam-panandroana mahazatra (zodiaka mikisaka; frantsay: zodiaque tropical) dia avy eo amin'ny 22 Jona ka miafara amin'ny 22 Jolay. Tsy mifanaraka amin'ireo ny fanandroana malagasy noho izy miandry tsinam-bolana.
| Adizaoza | Asorotany | Alahasaty | |
| Antokon-kintana | 21 Jona – 20 Jolay | 20 Jolay – 10 Aogositra | 10 Aogositra – 16 Septambra |
| Zodiakan-kintana | 16 Jona – 15 Jolay | 16 Jolay – 15 Aogositra | 16 Aogositra – 15 Septambra |
| Zodiaka mikisaka | 21 Mey – 21 Jona | 22 Jona – 22 Jolay | 23 Jolay – 22 Aogositra |
Ao amin'ny fanandroana malagasyHanova
Ao amin'ny fanandroana malagasy dia vintana fahefatra koa ny Asorotany ka ny zoron-trano atsimo-atsinana no toerana omena azy. Renivintana ny Asorotany. Araka ny finoan-drazana malagasy dia andro mahery ny Asorotany.
Misy amin'ny Malagasy ny mandray ny volana Asorotany ho volana fahefatra amin'ny taona ao amin'ny tetiandro malagasy (raha ny Alahamady no ataony volana voalohany).