Salamo faha-90

Ny Salamo faha-90 dia salamo ao amin' ny Bokin' ny Salamo ao amin' ny Baiboly. Tafiditra ao amin' ny fizaràna atao hoe "boky fahefetra" (Sal. 90 -106) ity salamo ity. Ny Salamo faha-89 no eo alohany ary ny faha-91 no manaraka azy.

Firafitra

Ity salamo ity dia fisaintsainana momba ny fotoana. Izy dia mampifanohitra ny fetran' ny zavaboary amin' ny tsy fananam-petran' ny Mpahary azy amin' ny lafiny iray vaovao: ny fotoana. Ny Mpahary dia mialoha ny famoronana (Salamo 90:1-3). Ny fotoan' Andriamanitra dia tsy azo ampitahaina amin' ny fotoan' olombelona (Salamo 90:4-12). Vavaka amin' Andriamanitra mba hananganana ny olona amin' ny fahalemeny (Salamo 90:15-17).

Lahatsoratra

Dikan-teny katôlika

¹Vavak'i Moizy, olon'Andriamanitra.

Tompo ô, hianao no aronay amin'ny taona rehetra mifandimby.

      ²Talohan'ny namoronanao ny tendrombohitra,

sy niterahanao ny tany sy izao rehetra izao:

dia efa nisy mandrakizay ka ho mandrakizay hianao, ry Andriamanitra!

      ³Mampanjary ny olombelona ho vovoka hianao,

ka manao hoe: Miverena, ry zanak'olombelona!

      ⁴Fa eo imasonao, ny arivo taona,

dia tahaka ny andro omaly, raha mandalo izy,

ary tahaka ny fiambenana iray amin'ny alina.

      ⁵Manindao azy toy ny nofy hianao;

ny maraina, mitsimoka indray izy, toy ny ahitra;

      ⁶mamony sy maniry izy ny maraina;

fa malazo sy maina ny hariva.

      ⁷Toy izany no andevonan'ny fahatezeranao anay,

sy ampitahoran'ny fahaviniranao anay.

      ⁸Apetrakao eo anoloanao ny helokay;

ary eo amin'ny fahazavan'ny tavanao, ny fahadisoanay takona.

      ⁹Azon'ny hatezeranao, dia foana avokoa ny andronay rehetra,

hitanay mihelina toy ny feo malemy, ny taonanay.

      ¹⁰Mahatratra ny fitopolo taona no andronay,

valopolo taona no fara-fahabetsany;

nefa hasasarana sy fahoriana foana ny voninahiny,

fa mihelina faingana izy, dia lasa manidina izahay!

      ¹¹Zovy no mahafantatra ny herin'ny fahatezeranao,

ary ny fahaviniranao, araka ny fahatahorana mendrika hatao anao?

      ¹²Ampianaro hanisa tsara ny andronay izahay,

mba hahazoanay fo hendry.

      ¹³Miverena, ry Iaveh, mandra-pahoviana no?...

Mamindrà fo amin'ny mpanomponao!

      ¹⁴Vokiso ny hatsaram-ponao izahay, ny maraina,

dia hifaly sy ravoravo, amin'ny andronay rehetra.

      ¹⁵Ampifalio araka ny andro nampahorianao anay izahay,

sy araka ny taona nahitanay loza.

      ¹⁶Aoka hiharihary amin'ny mpanomponao ny asanao,

mbamin'ny voninahitrao, ho an'ny taranany!

      ¹⁷Ho aminay anie ny fanambinan'ny Tompo, Andriamanitray!

Hamafiso aminay ny asan'ny tànanay;

Eny, hamafiso ny asan'ny tànanay!

Jereo koa

• Boky voalohany: Sal. 1 - 2 - 3 - 4 - 5 - 6 - 7 - 8 - 9 - 10 - 11 - 12 - 13 - 14 - 15 - 16 - 17 - 18 - 19 - 20 - 21 - 22 - 23 - 24 - 25 - 26 - 27 - 28 - 29 - 30 - 31 - 32 - 33 - 34 - 35 - 36 - 37 - 38 - 39 - 40 - 41.

• Boky faharoa: Sal. 42 - 43 - 44 - 45 - 46 - 47 - 48 - 49 - 50 - 51 - 52 - 53 - 54 - 55 - 56 - 57 - 58 - 59 - 60 - 61 - 62 - 63 - 64 - 65 - 66 - 67 - 68 - 69 - 70 - 71 - 72.
• Boky fahatelo: Sal. 73 - 74 - 75 - 76 - 77 - 78 - 79 - 80 - 81 - 82 - 83 - 84 - 85 - 86 - 87 - 89.
• Boky fahefatra: Sal. 90 - 91 - 92 - 93 - 94 - 95 - 96 - 97 - 98 - 99 - 100 - 101 - 102 - 103 - 104 - 105 - 106.
• Boky fahadimy: Sal. 107 108 - 109 - 110 - 111 - 112 - 113 - 114 - 115 - 116 - 117 - 118 - 119 - 120 - 121 - 122 - 123 - 124 - 125 - 126 - 127 - 128 - 129 - 130 - 131 - 132 - 133 - 134 - 135 - 136 - 137 - 138 - 139 - 140 - 141 - 142 - 143 - 144 - 145 - 146 - 149 - 150.

• Salamo apôkrifa: Salamo faha-151 - Salamo faha-152 hatramin' ny faha-155.