Salamo faha-103

Ny Salamo faha-103 dia salamo ao amin' ny Bokin' ny Salamo ao amin' ny Baiboly. Tafiditra ao amin' ny fizaràna atao hoe "boky fahefetra" (Sal. 90 -106) ity salamo ity. Ny Salamo faha-102 no eo alohany ary ny faha-104 no manaraka azy.

Lahatsoratra

Dikan-teny katôlika

    ¹Nataon'i Davida.

Misaora an'ny Tompo, ry fanahiko,

ary misaora ny anarany masina, ry ato anatiko rehetra!

      ²Misaora an'ny Tompo, ry fanahiko,

ary aza manadino ny soa betsaka avy aminy.

      ³Fa izy no mamela ny helokao rehetra,

manasitrana ny aretinao rehetra.

      ⁴Izy no manavotra ny ainao tsy hidina any an-davaka,

manarona hatsaram-po amam-pamindram-ponao.

      ⁵Izy no manototra soa ny fanirianao,

ary manavao ny fahatanoranao hanana ny herin'ny voromahery.

      ⁶Manao ny fitsarana Iaveh,

manome rariny an'izay rehetra nampahoriana.

      ⁷Nampiseho ny làlany tamin'i Moizy izy,

ary ny asany lehibe, tamin'ny zanak'Israely.

      ⁸Mamindra fo sy miantra Iaveh,

mahari-po sy be hatsaram-po.

      ⁹Tsy mba ho mandrakizay no mandevilevy izy,

tsy mitana fahatezerana mandrakizay.

      ¹⁰Tsy manao amintsika, araka ny fahotantsika,

ary tsy mamaly antsika, araka ny helotsika.

      ¹¹Fa tahaka ny hahavon'ny lanitra ambonin'ny tany,

no haben'ny hatsaram-pony amin'izay matahotra azy.

      ¹²Tahaka ny halaviran'ny atsinanana amin'ny andrefana,

no halaviran'ny anesorany amintsika ny hadisoantsika.

      ¹³Sahala amin'ny fangoraky ny ray ny zanany,

no fangorak'Iaveh an'izay matahotra azy.

      ¹⁴Satria fantany izay iforonantsika,

tsaroany fa vovoka ihany isika.

      ¹⁵Ny olombelona! Tahaka ny ahitra ny androny,

tahaka ny voninkazo any an-tsaha ny famoniny,

      ¹⁶ka vao tsofin'ny rivotra izy dia tsy eo intsony,

ary ny toerana nisy azy, tsy mahalala azy intsony.

      ¹⁷Fa maharitra mandrakizay kosa ny hatsaram-pon'ny Tompo ho an'izay matahotra azy,

sy ny fahamarinany amin'ny taranaky ny zanak'izy ireo,

      ¹⁸dia amin'izay mitandrina ny fanekeny,

sady mahatsiaro ny didiny mba hitandremany azy.

      ¹⁹Nampiorina ny seza fiandrianany any an-danitra Iaveh,

ary mihatra amin'ny zavatra rehetra ny fanjakany.

      ²⁰Misaora an'ny Tompo hianareo anjeliny,

izay mahefa sy mahery sy mankato ny didiny,

amin'ny fanekena ny feon'ny teniny.

      ²¹Misaora an'ny Tompo hianareo rehetra tafiny,

izay mpanompony sy manatanteraka ny sitrapony!

      ²²Misaora an'ny Tompo hianareo asany rehetra,

amin'ny fitoerana rehetra fanjakany.

Misaora an'ny Tompo, ry fanahiko.

Jereo koa

• Boky voalohany: Sal. 1 - 2 - 3 - 4 - 5 - 6 - 7 - 8 - 9 - 10 - 11 - 12 - 13 - 14 - 15 - 16 - 17 - 18 - 19 - 20 - 21 - 22 - 23 - 24 - 25 - 26 - 27 - 28 - 29 - 30 - 31 - 32 - 33 - 34 - 35 - 36 - 37 - 38 - 39 - 40 - 41.

• Boky faharoa: Sal. 42 - 43 - 44 - 45 - 46 - 47 - 48 - 49 - 50 - 51 - 52 - 53 - 54 - 55 - 56 - 57 - 58 - 59 - 60 - 61 - 62 - 63 - 64 - 65 - 66 - 67 - 68 - 69 - 70 - 71 - 72.
• Boky fahatelo: Sal. 73 - 74 - 75 - 76 - 77 - 78 - 79 - 80 - 81 - 82 - 83 - 84 - 85 - 86 - 87 - 89.
• Boky fahefatra: Sal. 90 - 91 - 92 - 93 - 94 - 95 - 96 - 97 - 98 - 99 - 100 - 101 - 102 - 103 - 104 - 105 - 106.
• Boky fahadimy: Sal. 107 108 - 109 - 110 - 111 - 112 - 113 - 114 - 115 - 116 - 117 - 118 - 119 - 120 - 121 - 122 - 123 - 124 - 125 - 126 - 127 - 128 - 129 - 130 - 131 - 132 - 133 - 134 - 135 - 136 - 137 - 138 - 139 - 140 - 141 - 142 - 143 - 144 - 145 - 146 - 149 - 150.

• Salamo apôkrifa: Salamo faha-151 - Salamo faha-152 hatramin' ny faha-155.