Hanokatra ny renilisitra

I Zedekia na Sedekiasa dia mpanjakan'i Jodà nanapaka teo anelanelan'ny taona 597 sy 587 tal J.K. Izy no mpanjaka farany tao amin'ny Fanjakan'i Jodà. Niara-belona taminy ny mpaminany Jeremia sy Zakaria. Tamin'ny androny no nandravàna an'i Jerosalema sy ny Tempoly ary nanaovana sesitany ny mponina tao Jodà. Zanaky ny mpanjaka Josia (na Josiasa) tamin'i Hamotala (zanaka vavin'i Jeremia avy any Libna) i Zedekia sady zandrin'i Eliakima (ny mpanjaka Joiakima na Joakima) sy Joahaza (2Mpaj. 23.31; Jer. 24.17-18). Resahina ao amin'ny Boky faharoan'ny Mpanjaka sy ny Bokin'i Jeremia ny tantaran'ny fanjakan'i Zedekia.

Ny anaranyHanova

I Matania (hebreo: Mattanyahu; grika: Mathanias)[1] no anarany talohan'ny naha mpanjaka azy. Ao amin'ny Tanakh (Baiboly jiosy amin'ny teny hebreo) dia atao hoe צִדְקִיָּהוּ / Şidhqiyyâhû (raha tsorina: Tsidkiyâhû) izy. Ao amin'ny Septoajinta (Baiboly jiosy amin'ny teny grika) kosa izy dia atao hoe ζεδεκιας / Zedekias fa ao amin'ny Volgata (Baiboly amin'ny teny latina) izy dia atao hoe Sedecias.

Ny loza nahazo an'i ZedekiaHanova

 
Novonoina teo imason'i Zedekia ireo zanany, nataon'i Gustave Doré, taona 1866.

Natoky ny fanampian'i Egipta i Zedekia ka nikomy tamin'ny mpanjakan'i Babilona (i Nebokadnetsara). Nitondra tafika ka nanao fahirano an'i Jerosalema ny Babiloniana nandritra ny roa taona ka naharodana ny tanàna tamin'ny taona 587 tal .J.K. Voasambotra i Zedekia (2Mpaj. 25.6, Jer. 52.9) ary novonoina teo imasony ireo zanany lahy (2Mpaj. 25.7; Jer. 52.10) alohan'ny nanapotsirana ny masony (2Mpaj. 25.7; Jer. 52.11).

Tsy novonoina ireo zanany vavy fa nampitondraina ilay governora jodaita notendren'i Nebokadnetsara atao hoe Gedalia (Jer. 41.10) nefa novonoin'i Ismaela izay isan'ny fianakavian'ny mpanjaka i Gedalia (2Mpaj. 25.25; Jer. 41.1) tao Mizpa (na Mitspa) (2Mpaj. 25.25; Jer. 41.2) sady nosamboriny ireo zanaka vavin'i Zedekia ka nentiny tany amin'ny tanin'ny Amona (Jer. 41.10). Nanenjika an'i Ismaela i Johanana ka nahatratra azy tao Gibeona (Jer. 41.12) sady nanafaka ny zanaka vavin'i Zedekia, dia nitondra azy ireo tao amin'ny toeram-piafenana tao akaikin'i Betela (Jer. 41.17) avy eo nitondra azy ireo ho any amin'ireo Jiosy monina any Egipta (Jer. 43.7).

Nodorana ny Tempolin'i Jerosalema sy ny lapan'ny mpanjaka ary nobaboina ny fananana tao aminy sady narodana ny mandan'ny tanàna[1]. Natao sesitany tany Babilona i Zedekia niaraka amin'ny mponin'i Jerosalema izay tsy afa-nandositra. Maty am-ponja tany Babilona i Zedekia (Jer. 52,11).

Jereo koa:Hanova

Mpanjakan'i JodàHanova

Saoly - Isboseta - Davida - Solomona (na Salômôna) - Rehoboama (na Roboama) - Abiama (na Abia) - Asa - Josafata - Jehorama (na Jorama) - Ahazia (na Okoziasa) - Atalia - Joasy (na Joasa) - Amazia (na Amaziasa) - Ozia (na Oziasa na Azaria na Azariasa) - Jotama - Ahaza (na Akaza) - Hezekia (na Ezekiasa) - Manase - Amona - Josia (na Josiasa) - Joahaza (na Joakaza) - Joiakima (na Joakima) - Joiakina (na Joasina na Jekonia na Jekoniasa) - Zedekia (na Sedekiasa).

Loharano sy fanamarihanaHanova

  1. 1,0 et 1,1 Histoire visuelle de la Bible, National Geographic, Les Nouveaux Essentiels, octobre 2013, 512 p.(ISBN 9782822900331)