Andriandranando (foko)
Ny Andriandranando na Zanadranando dia andriana merina nipoitra tamin' ny mpanjaka Andriandranandobe. Avy amin' ny faritry ny ala antsinanana izy no niakatra taty Imerina ankehitrio izy mba hitady zara-tany hanjakana. Tsy nataon-dRalambo ho isan' ny folovohitra ny taranak' Andriandranandobe fa notazominy ho andriana.
Ny mpanjaka Andriandranandobe hanova
Ny mpanjaka Andriandranandobe (niaina tamin' ny taonjato faha-16) no razambe nipoiran' ny terak' Andriandranando. Avy amin' ny faritry ny ala antsinanana izy no niakatra taty Imerina mba hitady zara-tany hanjakana. Zanaky ny mpanjaka Andriamamilazabe sy Andrianetohento izy.
Andriandranandobe hanova
Metisy maley sy arabo ny mpanjaka Andriandranandobe. Raha tonga teto anefa dia efa natanjaka ny fanjakan' Andriamanelo teo Alasora sy ny fanjakan-dRabiby teo Ambohidrabiby.
Tsy tia ady hanova
Na dia nalaza ho masin' ody aza Andriandranandobe dia tsy mba nila ady na nanosika ireo fanjakan' andriana efa niorona teo Alasora sy Ambohidrabiby fa nanao raharaham-pihavanana tamin' Andriamanelo ka nanoa ity farany no mba nisakaiza tsara tamin-dRabiby izay raibeny niteraka ny rainy, araka ny lovantsofina sasany. Ho marik' io fametraham-pihavanana io dia nomen' Andriamanelo ho vadin' Andriandranandobe i Rasoavimbahoaka anabaviny. Nanana vadikely hafa koa anefa Andriandranandobe.
Tsy nanjaka? hanova
Raha ny lovantsofina dia tsy mba nanjaka Andriandranandobe. Anefa ny porofo arkeolojika dia mandiso izany satria raha ny vohitr' Andriandranando no jerena dia manana ny fepetra rehetra saika hita amin' ny tendrombohitra 12 izy. Ambohibe ohatra dia sady avo no misy farihy masina eo amin' ny tehezany.
Ny zanaka lahin' Andrianandobe hanova
Telo lahy ny zanak' Andriandranandobe dia:
- Andriantompoinandriana, lahimatoa ao Ambohimailala, eo avaratr' Ambohibe;
- Andriakomahitsy, lahiaivo, tao Ambohibe izay tendrombohitra avo tokoa ahitana farihy masina fandevenana ny taovan' ireo Zanadranando tamin' izany;
- Andrianifantsy eo amin' ilay tampotanety atsimon' Ambohibe atao hoe Manankasina-Ambohipotsy akaikin' ny misy ny tanànan' i Père Pedro ankehitrio.
Ny Andriandranando hanova
Isan' ny andriana ny Andriandranando hanova
Ho takalon' izany raharaham-pihavanana sy fanoavana izany dia tsy mba nataon-dRalambo ho isan' ny folovohitra ny taranak' Andriandranandobe fa notazominy ho andriana, Andriandranandobe rahateo dia havana akaikin' ireo mpanjaka teo Alasora sy Ambohidrabiby ihany.
Ny andriambavy andriandranando hanova
Ireo andriambavy andriandranando dia miavaka amin' ny andriambavy rehetra satria somary toy ny tailandey maranidranitra izay izy ireo ary tena tsaratarehy tokoa raha amin' ny andriambavy rehetra. Vokatr' izany dia maro tamin' ireo mpanjaka merina no naka vady andriambavy andriandranando ka ny zanak' izy ireo dia saika nanjaka. Porofon' izany: ny mpanjaka Andriantsitakatrandriana dia niteraka an' Andriatsimitoviaminandriandehibe tamin' ny Andriandranadovavy atao hoe Ravololontsimitovy; ny mpanjaka Andriamasinavalona dia niteraka an' Andriatsimitoviaminandriana tamin' ny Andriandranandovavy atao hoe Ratompoindraondriana; ary ny mpanjaka Radama I dia nanambady an-dRasalimo zanaky ny mpanjaka sakalava atao hoe Ramitraho izay manana razana Andriandranando.
Asa sahananiny hanova
Tamin' ny fanjakan' andriana kosa dia ny fanefena vy no tena nahafantarana azy ary ankoatr' izany dia maro aminy koa no manenona lamba landy.
Niely eran' ny nosy hanova
Maro tamin' izy ireo koa anefa no nieli-patrana eran' ny nosy indrindra amin' ny faritr' i Fianarantsoa iny talohan' ny taona 1896. Niely tamin' ny vohitra manodidina an' Ambohibe ny terak' Andriandranando" : Ambohimailala, Ambohibe, Betsizaraina, Soamanandrariny, Iadiambola, Masinandriana, Manankasina ary Ampomanjaka, Ambato ao Ambohimangakely, Ankadindramamy, sns....
Tsy mba isan'ireo loharanon'Andriana nipoiran'ireo andriana merina ny Andriandranando nefa kosa dia nanjaka zanaka izy noho ny fifanambadiany tamin' ireo andriana merina dia nipoiran' Andriamasinavalona mpanjaka izy.
Isan' ny Andriateloray hanova
Isan' ireo Andriateloray ny Andriandranando, koa tamin' ny antanantohatr' andriana dia teo aorian' ny Andrianamboninolona sy eo anoloan' ny Zanadralambo no misy ny Andriandranando. Marihina anefa fa nisy foko hova, noho ny soa nataony tamin' ny andriana no nakarina ho andriana ho isan' ny Andriandranando.