Ny vovoka dia fitambaram-poti-javatra bitika sady maivana ka mora mitsingevana ao amin' ny rivotra, izay matetika manana habe latsaky ny 1.000 μm. Ny vovoka dia mety hiteraka olana lehibe amin' ny fahasalaman' ny olombelona sy ​​​​ny biby ary ny zavamaniry, ary koa amin' ny fampandehanana milina. Azo esorina ny vovoka amin' ny rivotra anaty toeram-ponenana na toeram-piesana amin' ny alàlan' ny fitaovam-pitrohana, ny fitaovam-pisivanana isan-karazany.

Tadio mitondra vovoka, any Aostralia

Toetoetry ny vovokaHanova

Ny vovoka dia foronin’ ny tsiraka avy amin' ny zavamaniry na biby, ny vovobony, ny silisy, ny bakteria ary ny bobongolo. Any amin' ny tanàn-dehbe, ny vovoka eny amin’ ny rivotra dia misy setroka sy poti-tara be dia be koa. Ao amin' ny tanàn-dehibe misy taozavabaventy, ny rivotra dia mety mitahiry poti-javatra bitika maherin'ny 3 tapitrisa isaky ny sm3. Ny haben' ny poti-javatra bitika ao amin’ ny vovoka dia miovaova eo amin'ny 0,5 ka hatramin' ny mikrôna maromaro. Mitsingevana ela eny amin' ny rivotra ireo poti-javatra ireo ary azon’ ny rivotra entina lavitra dia lavitra.

Afaka manaparitaka ny hazavana fohy halavan'onja ny vovoka, ka misy fiantraikany amin' ny lokon' ny lanitra izany, ary afaka miova ho vihy manamora ny fiandon' ny eton-drano. Ny zavona, ny setroka ary ny rahona dia tsy afaka miseho raha tsy misy ny tsindry avy amin’ ny poti-javatra bitika ao amin’ ny vovoka eny amin' ny rivotra.

Fiantraikan' ny vovokaHanova

Olana goavana miseho amin' ny alalan' ny fahalotoan' ny rivotra ny habetsahan' ny vovoka anaty rivotra eny an-tanàn-dehibe. Any amin' ny orinasa mpanamboarana koba sy siramamy ary any amin’ ny toeram-pitrandrahana arintany, ny fivangongoan' ny poti-javatra mora mirehitra dia mety hiteraka fipoahana. Mety hanimba ny fahasalamana ihany koa izy ireo rehefa voafoka, ka miteraka aretina toy ny silikôzy.