QIT Madagascar Minerals

Ny QIT Madagascar Minerals (QMM) dia orinasa kanadiana mpitrandraka harena an-kibon' ny tany ao Tôlagnaro (na Fort-Dauphin) ao amin' ny Faritra Anôsy any atsimo atsinanan' i Madagasikara izay mitrandraka ilmenita, dia ilay ataon' ny Malagasy hoe "fasi-mainty". Ny hoe QIT dia fanafohezana ny hoe "Quebec Iron and Titanium". Efa ho 20 taona taty aorian' ny nanaovana fanadihadiana sy fifampiraharahana ary fanaovana asa fanomanana ny QMM vao nanomboka namokatra ilmenita.

Sarina ilmenita

Ny akora trandrahana

hanova

Ny ilmenita

hanova

Ny ilmenita dia karazana mineraly vokatry ny fitambaran' ny ôksida mineralin' ny vy sy titàna manana raikipohy simika FeTiO3 izay ahitana maneziôma sy manganezy ary vanadiôma kely dia kely. Tsy tantera-pahazavana sady miloko mainty, izay mety hiova mankany amin' ny volontany mena somary manjelatra toy ny metaly izy ary mety hiendrika kristaly. Mety mahatratra 25 sm3 ny halehibeny.

Ny habetsahan' ny vokatra

hanova

Tamin'ny voalohany, ny habetsahan'ny vokatra ilmenita novinavinaina ho azo dia 750 000 taonina isan-taona, amin'ny fivoaran'ny fitrandrahana aty aoriana dia hitombo any amin'ny 2 000 000 taonina isan-taona izany. An' ny QIT-Fer et Titane, orinasa kanadiana izay rantsan'ny orinasa goavana atao hoe Rio Tinto ny 80 %n'ny vokatra; ny 20 % sisa no an'ny fanjakana malagasy.[1]

Mba hahazoany mampiasa sambo lehibe hanondranana ny ilmenita any ivelany dia namatsy vola ny fanjakana malagasy ny Rio Tinto tamin' ny fanamboarana ny seranan-tsambon' i Ehoala ao Tôlagnaro.

Famokarana angovo

hanova

Tamin' ny taona 2011, nanao sonia fifanarahana fividianana herinaratra niaraka tamin' ny mpamokatra herinaratra tsy miankina i Rio Tinto. Ny fotodrafitrasa dia hanambatra ny 8 MW amin' ny herin' ny masoandro, 12 MW amin' ny rivotra eny amoron-dranomasina ary ny rafitra fitahirizana angovo amin' ny bateria mba hanomezana herinaratra azo havaozina ny toeram-pitrandrahana ilmenita ao Fort Dauphin.

Olana eo amin' ny fananan-tany sy ny tontolo iainana

hanova

Olan'ny fananan-tany

hanova

Maro ny olona ao Tolagnaro nitaraina fa nalaina hanatontosana ny asan' ny QMM ny taniny sady nampanantenaina fa hahazoany tambiny na onitra ara-bola nefa tsy nahafa-po ny tompon-tany na tsy azony mihitsy izany tambiny na onitra izany.

Ahiahy momba ny tontolo iainana

hanova

Atahorana ny mety handotoan' ny QMM ny rano fisotro (izay sintonina avy amin' ny reniranon' Ambavarano) sy ny ranomasina ao Tolagnaro ary ny fiantraikan' izany amin' ny fahasalamam-bahoaka ao amin' io tanàna io.

Ny solombavambahoaka voafidy tao Toliara, Siteny Randrianasoloniaiko, dia nanainga ny fitondram-panjakana malagasy mba hidina any Tolagnaro hanao fanadihadiana momba io fitrandrahana io, fitrandrahana izay heverina fa miteraka fahasembanan' ny zaza sahala amin' ny vokatry ny baomba atômika[2].

Tamin' ny volana Janoary 2019 dia nisy trondro maro maty tao amin' ny sisin-dranomasin' i Tolagnaro ka niteraka tsy fahalafosan' ny hazandrano teny an-tsena izany sady nisy fiantraikany amin' ny asa fiveloman' ny mpanjono. Ahiahina fa akora simika tsy voatandrina avy tao amin' ny QMM ka niparitaka tao an-dranomasina no niteraka izany.

Jereo koa

hanova

Rohy ivelany

hanova

Tsiahy

hanova
  1. "Rio Tinto QMM Madagascar Titanium Dioxide Mining Project". QMM web site. Rio Tinto Group. Notsidihina tamin'ny 11 Marsa 2009.
  2. "Madagascar: les enfants victimes des mines d'ilménite" in la1ere.francetvinfo.fr (14/08/2018). Notsidihina 25/01/2019.