Wikipedia

Fizakan' i Andry Rajoelina zom-pirenena frantsay

Ny fizakan' i Andry Rajoelina zom-pirenena frantsay dia efa nanomboka tamin' ny taona 2014[1], nefa efa aty amin' ny taona 2023 vao nivoaka tamin' ny tambajotran-tserasera miaraka amin' ny porofo tsy azo lavina ny momba izany. Niteraka ady hevitra izany vaovao izany ka hevitra isan-karazany no nivoaka momba ny fananan' i Andry Rajoelina zom-pirenena tokana (frantsay) na roa (malagasy sy frantsay) sy ny maha ara-dalàna na tsia ny naha filohan' ny Repoblika azy nanomboka tamin' ny taona 2019 sy ny filatsahany ho fidina filohan' ny Repoblika amin' ny taona 2023.

Andry Rajoelina

Zava-misy manodidina

hanova

Tsy fahafahana milatsaka ho fidina filohan' ny Repoblika tamin' ny taona 2013

hanova

Nandritra ny Tetezamita teto Madagasikara, tamin' ny volana Janoary 2013 dia nilaza ny tsy hirotsaka ho kandidà amin' ny fifidianana filoham-pirenena 2013 i Andry Rajoelina[2]. Tamin' ny volana Jolay 2013, taorian' ny fifanolanana momba ny fiverenan' i Marc Ravalomanana an-tanindrazana sy ny fikasan' ireo lohandohan' ny ankolafy mpandray anjara amin' ny fitantanana ny Tetezamita (ankolafy Ravalomanana, ny ankolafy Didier Ratsiraka, ny ankolafy Zafy Albert ary ny ankolafy Andry Rajoelina) ny hilatsaka koa, dia nanambara ny tenany hirotsaka hofidiana indray i Andry Rajoelina[3]. Nambaran' ny Southern African Development Community (SADC) ny sazy hahazo ny firenena malagasy raha tsy esorina ny kandidatiorany sy ny an' ny roa hafa (Lalao Ravalomanana sy Didier Ratsiraka)[4]. Nanaiky ny hiala amin' ny filatsahana ho filoham-pirenena izy ireo nefa afaka nanendry kandidà mpisolo toerana. Izany no nahatonga ny filatsahan-kofidin' i Hery Rajaonarimampianina, kandidà mpisolo toerana an' i Andry Rajoelina[5].

Nipetraka tany Frantsa ny fianakaviana Andry Rajoelina taorian' ny fanekeny ny hisitaka amin' ny fanaovana pôlitika mba hahafahan' ny firenena hiverina amin' ny lamina araka ny lalàmpanorenana.

Tsy fifanarahana tamin' ny filoha Hery Rajaonarimampianina (2014-2018)

hanova

Rehefa lany soa aman-tsara ho filohan' ny Repoblika i Hery Rajaonarimampianina dia tsy nanaraka ny toromarika nomen' i Andry Rajoelina, ka anisan' izany ny tokony hanendrena praiminisitra atolotry ny antokon' i Andry Rajoelina sy ny tsy tokony hamoronany antoko pôlitika vaovao. Rava tamin' ny taona 2014 ny fifandraisan' izy roa tonta. Raikitra ny fanoheran' ny antokon' i Andry Rajoelina an' i Hery Rajaonarimampianina izay niafara tamin' ny fananganana governemanta vaovao sy fanaovana fifidianana alohan' ny fotoana tamin' ny taona 2018[6][7].

Fahazoana ilay zom-pirenena vahiny

hanova

Tsy nambara tamin' ny Malagasy

hanova

Tamin' ny taona 2013 no nanaovan' i Andry Rajoelina fangatahana zom-pirenena frantsay ka tamin' ny taona 2014 no nahazoany izany[1]. Nivoaka ny didim-panjakana nosoniavin' ny praiminisitra frantsay Manuel Valls sy ny minisitry ny Atitany frantsay Bernard Cazeneuve, tamin' ny 19 Nôvambra 2014. Niseho tao amin' ny gazetim-panjakanan' ny Repoblika Frantsay laharana faha-269 tamin' ny 21 Nôvambra 2014 ny fanapahan-kevitra momba izany. I Mialy Razakandisa vadiny sy ny zanany telo koa dia misitraka izany zom-pirenena frantsay izany[8]. Tsy nambaran' i Andry Rajoelina tamin' ny Malagasy izany fananany zom-pirenena frantsay izany ary tsy nanao fanambaràna momba izany koa izy tamin' ny fametrahany ny antontan-taratasy filatsahan-ko fidina ho filohan' ny Repoblika ka afaka nilatsaka soa aman-tsara.

Fivoahan' ilay tsiambaratelo

hanova

Taty amin' ny volana Jona 2023 vao nivoaka tao amin' ny tambajotran-tserasera tamin' ny alalan' i Fanirisoa Ernaivo, izay sady mpitsara no filohan' ny RMDM Diaspora[9], sy nohamafisin' ny haino aman-jery frantsay ny porofo momba io fananany zom-pirenena frantsay nangatahina io, na dia efa nivoaka an-gazety ny firesahana momba izany talohan' io fotoana io nefa tsy nisy porofo. Niteraka resabe sy ady hevitra teo amin' ny mpanao pôlitika sy ny mpahay lalàna ary ny mpanaraka ny raharaham-pirenena malagasy izany zavatra izany[10].

Ady hevitra

hanova

Hevitr' i Andry Rajoelina sy ny mpomba azy

hanova

Matetika no tsy mifanaraka ny valin-tenin' ny mpanohana an' i Andry Rajoelina momba ny fisitrahany ny zom-pirenena frantsay.

Zom-pirenena nolovaina

hanova

Ny mpiaro an' i Andry Rajoelina sasany dia milaza fa mizaka zom-pirenena roa, malagasy sy frantsay, i Andry Rajoelina. I Romy Voos Andrianarisoa, talen' ny Kabinetran' ny fiadidiana ny Repoblika, fony izy tany Geneva nanatrika ny Fihaonamben' ny Organisation internationale du travail (OIT), dia nilaza tamin' ny mpanao gazetin' ny Le Monde fa ny dadan' ny dadaben-dRajoelina dia nizaka ny zom-pirenena frantsay[11][12][13][14]. Nanamafy izany koa i Lalatiana Rakotondravahy, minisitry ny Serasera sy ny Kolontsaina[15][16][17].

Zom-pirenena azo tamin' ny alalan' ny diplômasia

hanova

Ny sasany koa dia milaza fa tamin' ny alalan' ny diplômasia no nahazoan' i Andry Rajoelina ny zom-pirenena frantsay fa tsy tamin' ny alalan' ny fangatahana, na dia ny mifanohitra amin' izany aza no marina, dia ny nanaovan' i Andry Rajoelina fangatahana zom-pirenena frantsay.

Tsy nandova zom-pirenena frantsay i Andry Rajoelina

hanova

Nambara ny filohan' ny Repoblika, Andry Rajoelina fa tsy nandova zom-pirenena frantsay satria nanary izany zom-pirenena izany ny rainy izay nisitraka izany talohan' ny fahaleovantenan' i Madagasikara[18].

Mijanona ho Malagasy na dia mizaka ny zom-pirenena frantsay

hanova

Misy koa ireo nilaza fa tsy manova ny maha Malagasy an' i Andry Rajoelina sy ny fitiavan-tanindrazany ny fizakany ny zom-pirenena frantsay[19][20]. Tsy vitsy ihany koa, hoy izy ireo, ny mpitondra malagasy nanana zom-pirenena frantsay, ka anisan' ny voatonona ny jeneraly Ramanantsoa, araka ny hita ao amin' ny Madagate ("Anisan' izany isika eto Madagasikara hatramin' izay, raha tsy mikasika an' ny Jeneraly Gabriel Ramanantsoa (13 avrily 1906 - 09 may 1979) izay nandimby ny Filoha Philibert Tsiranana, ny taona 1972. Tsy vitan' ny hoe nanambady frantsay vavy izy fa sady nizaka zom-pirenena frantsay sy malagasy izy.")[21][22].

Lalàna malagasy efa tsy manan-kery intsony

hanova

Ny hafa indray miaiky fa nangatahin' i Andry Rajoelina ilay zom-pirenena frantsay fa tsy nolovainy tamin' ny ray aman-dreniny, nefa noho ny tsy nampiharana hatry ny ela ny lalàna momba ny zom-pirenena malagasy, ka nahafahan' ny Malagasy maro nanana zom-pirenena roa, dia foana hoazy io lalàna io na dia tsy misy lalàna hafa nanafoana azy[23][24]. Manamarika an' io tsy fampiharana ilay lalàna io ny filazana ao amin' ny Madagate[25]. Noho izany, amin' izy ireo, dia tsy very ny fizakan' i Andry Rajoelina ny zom-pirenena malagasy, ary mizaka zom-pirenena roa malagasy sy frantsay izy.

Ny hevitr' ireo tsy ao amin' ny fitondram-panjakana

hanova

Zom-pirenena tokana: frantsay

hanova

Tsy nandova zom-pirenena frantsay amin' ny maha zanak' olona mizaka rahateo ny zom-pirenena frantsay i Andry Rajoelina matoa nangataka izany ary nahazo izany tamin' ny alalan' ny didim-panjakana, araka ny voasoratra ao amin' ny gazetim-panjakana frantsay. Ny mpitsikera ny fitondrana Rajoelina sy ny mpahay lalàna maro dia milaza fa very ny fizakan' i Andry Rajoelina ny zom-pirenena malagasy ka tsy manana afa-tsy zom-pirenena frantsay izy[26][27][28].

Mbola manan-kery ilay didy hitsivolana

hanova

Mbola manan-kery ny didy hitsivolana mifehy ny zom-pirenena malagasy satria mbola tsy misy didy hitsivolana na lalàna nasolo na nanafoana azy sady mbola tsy nisy olona nitondra porofo ny amin' ny fananan' ny Malagasy iray na maro zom-pirenena frantsay nefa mbola mitahiry ny zom-pirenena malagasy, tsy anisan' izany ny olona ao na tao amin' ny Tafika malagasy. I Andry Rajoelina no voaporofo fa manana zom-pirenena frantsay.

Vokatry ny tsy fananana intsony ny zom-pirenena malagasy

hanova

Tsy tokony ho nahazo nilatsaka ho filohan' ny Repoblika tamin' ny taona 2018 i Andry Rajoelina satria tsy nanaja ny Lalàmpanorenana[29][30][26]. Efa tsy Malagasy i Andry Rajoelina nanomboka tamin' ny nahazoany ny zom-pirenena frantsay tamin' ny taona 2014, ary tsy tokony nitondra an' i Madagasikara amin' ny maha filohan' ny Repoblika azy tamin' ny taona 2019, ka tokony hametra-pialana na hesorina fa mpamadika tanindrazana[26][31]. Voahitsakitsaka ny fiandrianam-pirenena satria Frantsay no mitondra an' i Madagasikara[32].

Ny lalàna

hanova

Ny lalàna momba ny zom-pirenena malagasy sy ny lalàna momba ny zom-pirenena frantsay no voakasiky ny adihevitra momba ny zom-pirenen' i Andry Rajoelina.

Ny lalàna frantsay

hanova
 
Sainam-pirenena frantsay

Ny zom-pirenena frantsay dia fehezin' ny Code civil ("Fehezandalàna Sivily") sy ny Lalàmpanorenan' ny Repoblika Frantsay[33]. Misy ny fanavahana ny fanolorana ny zom-pirenena frantsay (attribution de la nationalité), vokatry ny maha manam-piaviana frantsay, sy ny fahazoana izany (acquisition de la nationalité) ho an' ny olona nateraky ny ray sy reny tsy frantsay.

Fahazoana ny zom-pirenena noho ny fanana ray na reny frantsay

hanova

Frantsay noho ny fianahana (filiation) ny zaza nateraky ny ray na reny frantsay na izy roa miaraka. Zo avy amin' ny ra izany (droit du sang, na jus sanguinis)[34].

Fahazoana zom-pirenena amin' ny alalan' ny didim-panjakana

hanova

Azo amin' ny alalan' ny "didim-panjakana fananganana ho olom-pirenena" (décret de naturalisation) koa ny zom-pirenena frantsay, ho an' ny olon-dehibe vahiny nangataka izany, izay efa zatra nipetraka tao amin' ny tanim-pirenena frantsay nandritra ny dimy taona farafahakeliny, izany fe-potoana izany dia mety hihena amin' ny toe-javatra sasany toy ny fianarana any Frantsa sy ny fanatanterahana asa lehibe ho an' i Frantsa.

Araka ny andininy faha-21-24 ao amin' ny Code civil frantsay dia tsy misy olona azo atsangana ho olom-pirenena frantsay raha tsy voamarina ny firaisam-pony amin' ny fiarahamonina frantsay, indrindra amin' ny alalan' ny fahalalany ampy ny teny frantsay, ny tantaran' i Frantsa, ny kolontsaina frantsay ary ny fiarahamonina frantsay. Takina koa ny fahalalany ampy momba ny zo sy ny adidy adidy omen' ny zom-pirenena frantsay sy ny fankatoavany ny foto-kevitra sy ny soatoavina fototry ny Repoblika.

Manao sonia ny "Dina mifehy ny zo sy adidin' ny olom-pirenena frantsay" (Charte des droits et devoirs du citoyen français) ilay olona rehefa azo raisina ny fangatahany[35][36][37].

Ny lalàna malagasy

hanova
 
Sainam-pirenena malagasy

Amin' ny maha filohan' ny Repoblikan' i Madahasikara an' i Andry Rajoelina dia ny Lalàmpanorenana malagasy sy ny Lalàna fehizoro momba ny fifidianana ary ny Fehezan-dalàna momnba ny zom-pirenena malagasy no voakasika.

Ny Lalàmpanorenana malagasy

hanova

Araka ny andininy faha-46 ao amin' ny Lalàmpanorenana malagasy tamin' ny 17 Nôvambra 2010, ny olona tsy mizaka ny zom-pirenena malagasy dia tsy afaka mirotsaka amin' ny fifidianana filohan' ny Repoblikan' i Madagasikara[38][39].

Ny Lalàna fehizoro momba ny fifidianana

hanova

Ny toko faha-4 ao amin' ny Lalàna fehizoro laharana faha-2018-009 mifehy ny fifidianana ny filohan' ny Repoblika no miresaka ny fepetra ahafaha-mirotsaka ho fidina[40]. Ao amin' ny andininy faha-10 dia anisan' ny takina miaraka amin' ny fanambaràna ny filatsahan-ko fidina ny kopian' ny sora-pahaterahana na ny karapanondrom-pirenena, sy ny taratasy fanamarinana ny fizakana ny zom-pirenena malagasy voaisy daty tsy mihoatra ny telo volana[41].

Ny Fehezan-dalàna momba ny zom-pirenena malagasy

hanova

Ny andininy faha-42 hatramin' ny faha-49 ao amin' ny Fehezan-dalàna momba ny zom-pirenena malagasy no mahakasika ny fahaverezan' ny zom-pirenena malagasy, nefa ny andininy faha-42 hatramin' ny faha-46 no resahina matetika amin' ity fananan' i Andry Rajoelina zom-pirenena frantsay ity:

  • Araka ny andininy faha-42 ao amin' ny Didy hitsivolana laharana faha-60-064 tamin' ny 22 Jolay 1960 momba ny zom-pirenena malagasy, dia very avy hatrany ny fizakana ny zom-pirenena malagasy raha nahazo zom-pirenena vahiny an-tsitrapo ny Malagasy feno taona[42][43].
  • Tsy anisan' izany ny Malagasy ao amin' ny Tafika malagasy nahazo zom-pirenena vahiny, izay tsy mahavery ny fizakany ny zom-pirenena malagasy raha tsy manao fangatahana amin' ny fitondram-panjakana malagasy ka mahazo izany, araka ny andininy faha-43[44][45].
  • Ny andininy faha-44 dia mahakasina ny fanovana ny fe-potona lazain' ny andininy faha-43 raha misy ny ady mitam-piadiana ifanaovana amin' ny firenena hafa[46].
  • Ny andininy faha-45 dia mahakasika ireo manana zom-pirenena roa na mihoatra (malagasy sy vahiny) izay afaka mangataka hanary ny zom-pirenena malagasy[47].
  • Ny andininy faha-46 dia milaza fa tsy terena intsony haneho fanajana sy fanoavana eo anatrehan' ny firenena malagasy ny olona tsy mananana intsony ny zom-pirenena malagasy[48].

Jereo koa

hanova

Rohy ivelany

hanova

Fehezan-dalàna mifehy ny zom-pirenena malagasy

Fehezan-dalàna mifehy ny zom-pirenena frantsay

Lalàna fehizoro mifehy ny fifidianana filoham-pirenena

Lalàmpanorenena malagasy

Loharano sy fanamarihana

hanova
  1. ↑ 1,0 et 1,1 "Madagascar : le président Rajoelina est bien français", Le Monde.fr,‎ 15 juin 2023 (vakio eto [tahiry], notsidihina tamin' ny 15 juin 2023)
  2. ↑ Madagascar: Rajoelina renonce, le Figaro.
  3. ↑ Fifidianana filoha – Kandidà tsy nampoizina tamin’ ny ora farany Rajoelina Andry
  4. ↑ "Madagascar fait un pas vers la présidentielle", Le Monde
  5. ↑ "Kopian' ny arisiva". Archived from the original on 2013-11-11. Retrieved 2013-11-15.
  6. ↑ « Vote de destitution : analyse des causes » [tahiry] Francetvinfo.
  7. ↑ « Madagascar : la Cour constitutionnelle ordonne la nomination d’un gouvernement d’union nationale » [tahiry], JeuneAfrique.com
  8. ↑ "Madagascar : le président Rajoelina est bien français", Le Monde.fr,‎ 15 juin 2023 (vakio eto [tahiry], notsidihina tamin' ny 15 juin 2023)
  9. ↑ Ny RMDM Diaspora dia ny Rodoben' ny Mpanohitra ho an' ny Demokrasia eto Madagasikara any ivelany.
  10. ↑ "Madagascar : polémique sur la nationalité française du président Andry Rajoelina", aa.com.tr, 21 Jona 2023
  11. ↑ "Gazety Le Monde: voaporofo fa mizaka ny zom-pirenena frantsay ny filoha Rajoelina", infokmada.org Archived Jiona 25, 2023 at the Wayback Machine (Youtube)
  12. ↑ " 'Le président Rajoelina n’a pas encore perdu sa nationalité malgache', dixit Lalatiana Rakotondrazafy Archived Jiona 25, 2023 at the Wayback Machine", madagascar-tribune.com, 17 Jona 2023.
  13. ↑ "Monsieur le Président français de la République de Madagascar Archived Jiona 25, 2023 at the Wayback Machine", madagascar-tribune.com, 17 Jona 2023.
  14. ↑ "Madagascar : le président Rajoelina a bien la nationalité francaise", habarizacomores.com (15/06/2023)
  15. ↑ "Lalatiana Rakotondrazafy indique que Andry Rajoelina est Français par filiation et n’a pas renoncé à sa nationalité malgache", 2424.mg, 16 Jona 2023
  16. ↑ "Double nationalité du président: un faux débat, selon Lalatiana Rakotondrazafy", newsmada.com, 16 Jona 2023.
  17. ↑ Hoy ny minisitra Lalatiana Rakondravahy tao amin' ny fandaharana "Lazao ny Marina" tao amin' ny TVM : "[…] Hamafisiko eto ah, fa ny ra- …. ny dadaben' ny dadabeny, dadan' ny dadaban' ny dadabeny, tsy haiko tsara izany fa hoe ny euh euh ny raiamandrenibeany any amin' ny quatrième génération dia efa frantsay. Izay izany ah, tazomiko hamafisiko eto izay fa izay tompoko ny zava-misy marina. Mino aho fa na ny filoha Andry Rajoelina izay ao aoriana dia mbola afaka mamoaka an’izany, manamafy an' izany zavatra teneniko izany, mamoaka ny fanaporofoana an' izany raha ilaina izany ah […]"
  18. ↑ Hoy i Andry Rajoelina: "[…] Ny raiko a, dia niditra tao amin’ ny miaramila euh ah frantsay izy, nanapa-kevitra izy hoe : hijanona ho tafika malagasy. Rehefa mijanona amin’ ny tafika malagasy izay ah dia very ny zom-pirenena maha euh frantsay azy […]".
  19. ↑ "Réponse indirecte de Andry Rajoelina sur sa binationalité Archived Jiona 25, 2023 at the Wayback Machine", madagascar-tribune.com, 19 Jona 2023
  20. ↑ « Madagascar : la nationalité française présumée du président Andry Rajoelina provoque une crispation politique » [tahiry], TV5Monde, 22 jona 2023
  21. ↑ Izao ny voasoratra ao amin' ny Madagate: "Anisan' izany isika eto Madagasikara hatramin' izay, raha tsy mikasika an' ny Jeneraly Gabriel Ramanantsoa (13 avrily 1906 - 09 may 1979) izay nandimby ny Filoha Philibert Tsiranana, ny taona 1972. Tsy vitan' ny hoe nanambady frantsay vavy izy fa sady nizaka zom-pirenena frantsay sy malagasy izy.", madagate.org (01/07/2023)
  22. ↑ Fanamarihana: Miaramila ny janeraly Ramanantsoa ka tsy mety ho very mihitsy ny zom-pirenena malagasy ananany raha tsy mangataka izany amin' ny governemanta malagasy izy ka mahazo izay angatahiny, araka ny andininy faha-43 amin' ilay fehezean-dalàna momba ny zom-pirenena malagasy.
  23. ↑ Tsy foana ho azy anefa ilay lalàna raha mbola eo ilay zavatra feheziny amin' ny maha lalàna azy, na raha tsy misy lalàna mitovy ambaratonga aminy nasolo azy na manafoana azy, raha tsy misy lalàna ambony ambaratonga noho izy izay manafoana ny fampiharana azy.
  24. ↑ Anisan' ny nanohana izany hevitra izany i Idéalson Keron, solombavambahoaka voafidy tany amin' ny Distrikan' Ampanihy, nefa niova hevitra taty aoriana.
  25. ↑ Izao no filazan' ny Madagate: "Io fepetra noraisina taoriana kelin' ny fiveranan' ny Fahaleovantenan' i Madagasikara io anefa dia zara raha nampiharina, hany ka tsy nampiasaina intsony mihitsy aza ka lasa toa haingon-dalàna sisa", magadate.org (01/07/2023)
  26. ↑ 26,0 26,1 et 26,2 "Resaka zom-pirenena frantsay Hisy akony ara-politika ho an-dRajoelina ve ?", Tiatanindrazana.mg
  27. ↑ "Andry Rajoelina: nanao "fausse déclaration" momban’ny fizakana ny zom-pirenena malagasy Archived Jiona 25, 2023 at the Wayback Machine" infokmada.org
  28. ↑ " 'Andry Rajoelina n'est plus un bi-national, il est exclusivement français', selon un avocat", koolsaina.com
  29. ↑ "Polémique à Madagascar : le président n'est pas malgache... mais français" [tahiry], Francetvinfo.fr, 21 juin 2023
  30. ↑ "Madagascar : polémique sur la nationalité française du président Andry Rajoelina" [tahiry], sur Anadolu Agency, 21 juin 2023
  31. ↑ "Antoko politika miisa sivy: miantso ny hiarovana ny soatoavina repoblikanina", newsmada.com, 24 Jona 2023
  32. ↑ "Fizakana zom-pirenena frantsay: mangata-panazavana amin' ny filoha Rajoelina ny MMM", newsmada.com, 17 Jona 2023.
  33. ↑ Ny zo sivika sy pôlitika dia ny fahafahana: mifidy, milatsaka ho  fidina, manao ny asan' ny mpitsara, mijoro vavolombelona eo anetrehan' ny fitsarana, mitondra fitaovam-piadiana, mirotsaka ao amin' ny tafika, misahana raharaha fampianarana, sns
  34. ↑ Code civil andininy faha-18 (arsiva).
  35. ↑ « Article 21-24 de la loi du 16 juin 2011 » [arsiva], legifrance.gouv.fr
  36. ↑ « Questions entretien naturalisation Archived Jiona 30, 2023 at the Wayback Machine » [arsiva], naturalisation-francaise.fr.
  37. ↑ « Naturalisation par décret 2022 », francedemarche.fr [arsiva], 24 juillet 2018
  38. ↑ Jean-Pierre Maury, "Madagascar, Constitution de la IVe République 2010, Digithèque MJP" [tahiry], mjp.univ-perp.fr.
  39. ↑ Inty ny andalana voalohan' ny andininy faha-46 ao amin' ny Lalàmpanorenena malagasy: "Tout candidat aux fonctions de Président de la République doit être de nationalité malagasy, jouir de ses droits civils et politiques, avoir au moins trente-cinq ans à la date de clôture du dépôt des candidatures, résider sur le territoire de la République de Madagascar depuis au moins six mois avant le jour de la date limite fixée pour le dépôt des candidatures".
  40. ↑ "Loi organique 2018-009 relative à l'élection du Président de la République" (pdf), ceni-madagascar.mg
  41. ↑ Inty ilay andininy faha-10:"Tout candidat aux fonctions de Président de la République, outre les conditions prévues à l’article 46 de la Constitution, doit : - être en règle vis-à-vis des lois et règlements relatifs à l’inscription sur la liste électorale et justifier d’une inscription effective sur cette liste; - avoir rempli ses obligations fiscales et s’être acquitté de tous les impôts et taxes exigibles de toute nature ; - n’avoir jamais été condamné pour crimes ou délits par une décision de justice devenue définitive ; - avoir rempli ses obligations en matière de déclaration de patrimoine, pour toute personne concernée."
  42. ↑ Didy hitsivolana laharana faha-60-064 tamin' ny 22 Jolay 1960
  43. ↑ Inty ny andininy faha-42 ao amin' ny Didy hitsivolana faha-60-064: "Perd la nationalité malgache, le Malgache majeur qui acquiert volontairement une nationalité étrangère."
  44. ↑ Ity ny andininy faha-43 ao amin' ny Didy hitsivolana faha-60-064: "Toutefois, jusqu’à l’expiration d’un délai de quinze ans à partir, soit de l’incorporation dans l’armée active, soit de l’inscription sur les tableaux de recensement en cas de dispense du service actif, la perte de la nationalité malgache est subordonnée à l’autorisation du Gouvernement malgache. Cette autorisation est accordée par décret. Ne sont pas astreints à solliciter l’autorisation de perdre la nationalité malgache: 1° Les exemptés du service militaire; 2° Les titulaires d’une réforme définitive; 3° Tous les hommes, mêmes insoumis, après l’âge où ils sont totalement dégagés des obligations du service militaire, conformément à la loi sur le recrutement de l’armée"
  45. ↑ Matetika tsy resahin' ny mpahay lalàna sy mpaneho hevitra manohana ny fitondrana ity resaka momba ny olona ao amin' ny Tafika malagasy ity ka mahatonga ireo andininy manadrify azy (andininy faha-43 ka hatramin' ny faha-45) ho toa mahakasika ny sokajin' olona renetra.
  46. ↑ Inty ny andininy faha-44 ao amin' ny Didy hitsivolana faha-60-064: "En temps de guerre, la durée du délai prévu à l’article précédent peut être modifiée par décret."
  47. ↑ Inty ny andininy faha-45 ao amin' ny Didy hitsivolana faha-60-064: "Perd la nationalité malgache, le Malgache, même mineur, qui, ayant une nationalité étrangère, est autorisé, sur sa demande, par le Gouvernement malgache, à perdre la qualité de Malgache. Cette autorisation est accordée par décret. Le mineur doit, le cas échéant, être autorisé ou représenté dans les conditions prévues à l’article 36."
  48. ↑ Inty ny andininy faha-46 amin' ny Didy hitsivolana faha-60-064: "Le Malgache qui perd la nationalité malgache est libéré de son allégeance à l’égard de Madagascar: 1° Dans le cas prévu aux articles 42 et 43 à la date de l’acquisition de la nationalité étrangère;2° Dans le cas prévu à l’article 45 à la date du décret l’autorisant à perdre la qualité de Malgache."
Hita tao amin'ny "https://mg.wikipedia.org/w/index.php?title=Fizakan%27_i_Andry_Rajoelina_zom-pirenena_frantsay&oldid=1090376"