Haiteny ara-drafitra
Ny haiteny ara-drafitra, amin' ny haiteny, dia manondro sekoly na rijan-kevitra izay iheverana ny fiteny ho lamin-drafitra semiôtika mifehy tena, izay singa voafaritra amin' ny fifandraisany amin' ny singa hafa ao anatin' ilay lamina. Avy amin' ny asan' ny mpahay teny soisa Ferdinand de Saussure izany ary anisan' ny fomba fijery ankapobeny momba ny stroktoralisma. Ny bokin' i Saussure mitondra ny lohateny hoe Cours de linguistique générale, nivoaka taorian' ny nahafatesany tamin' ny 1916, dia nanantitrantitra ny fandinihana ny fiteny ho toy ny rafi-tsinga mifandray. I Saussure dia fantatra ihany koa amin' ny fampidirana ny fototra maromaro amin' ny famakafakana semiôtika izay mbola manan-danja ankehitriny. Ny roa amin' ireo no fomba fototra ananany amin' ny famakafakana ara-tarika sy ara-karazana, izay mamaritra ny singa ara-drariteny sy ara-boambolana, araka ny fifanoheran' izy ireo amin' ny singa hafa ao amin' ilay rafitra. Ny hoe stroktoralisma amin' ny maha teny azy, na izany aza, dia tsy nampiasain' i Saussure, izay niantso izany fomba fiasa izany hoe semiôlojia. Ny teny hoe stroktoralisma dia noraisin' ny mpahay teny tao amin' ny Sekolin' i Prague toa an' i Roman Jakobson sy i Nikolai Trubetzkoy, ka tafiditra ao amin' ny haiteny taorian' ny nahafatesan' i Saussure; raha noforonin' i Louis Hjelmslev ny teny hoe haiteny ara-drafitra.
Ny haiteny ara-drafitra, noho izany dia mitaky ny fanaovana angon-dahateny, avy eo miezaka ny manasokajy ny singa rehetra ao amin' ilay angona araka ny ambaratonga ara-kaiteny: ny feon-teny, ny hasin-teny, ny sokajin-teny, ny tarika anarana, ny tarika matoanteny, ary ny karazam-pehezanteny.