Ny fiteny kanty na fiteny kanta na fiteny hanty na fiteny ôstiaka, dia fiteny ao amin' ny fianakaviam-piteny finô-ogriana, teny nibeazan’ ny vahoaka Kanty (Khanty). Ny fiteny mifandray akaiky indrindra aminy dia ny fiteny mansy (izay mandrafitra ny sampana ôb-ogriana ao amin' ny fiteny ogriana miaraka amin' ny fiteny kanty) sy ny fiteny hongariana; ireo fiteny telo ireo dia miaraka mandrafitra ny sampana ogriana.

Olona miisa 23 500 eo ho eo no miteny izany any Rosia, ka nobeazina faha kely tamin' izany 14 000 ary miteny rosiana ny 52,8 %, eo amin' ny morony atsinanan' ny reniranon' i Ob sy eo amoron' ny sakeli-dranony, ao amin' ny distrikan' i Khantia-Mansia (ny renivohitra dia i Khanty-Mansiysk). Misy Kanty koa ny any avaratra kokoa, ao amin' ny distrikan' i Yamalo-Nenets.

Satria miparitaka any amin' ny faritra midadasika ny Vahoaka Kanty, dia manana endrika fitenim-paritra ny fiteny kanty ka miteraka olana amin' ny fifandraisan’ ny samy mpiteny azy. Izany no antony tsy nahafahana namorona fiteny filamatra tokana. Ny boky nosoratana manokana momba ny fiteny kanty dia nosoratana tamin' ny fiteny samihafa.

Ny anarana iantsoan' ny Kanty ny tenany (Kăntə̂γ na Kantəγ any andrefana ary χăntə, χăntĭ any avaratra) dia midika hoe "olombelona" amin' ny fiteny kanty, saingy azo inoana fa avy amin' ny teny hôngroà hoe had ("tafika", "ady" na "fifandirana"). Ny anarana hoe Ôstiaka (Ostyak), izay nampiasaina voalohany hanondroana ny mponina rehetra any Siberia, dia avy amin' ny teny tiorka-tatara.

Ny fitenim-paritra avaratra dia tsy misy afa-tsy endrika araka anjara asa (na kaso) telo (ny tsotra - nominatif sy ny manondro toerana - locatif ary ny milaza fiampitana - translatif). Amin' ny fandrafetana fehezanteny saro-drafitra kokoa dia ampiasaina ny endrika milaza fialana (ablatif) sy ny milaza iharana (accusatif). Ny fitenim-paritra tatsinanana dia manavaka endrika araka anjara asa miisa iraika ambin' ny folo.

Jereo koa hanova