Filôzôfian' ny fiteny

Ny filôzôfian' ny fiteny dia sampan' ny filôzôfia izay liana amin' ny fiteny, ary indrindraindrindra ny dikany, ny zavatra tondroin' ny teny na ny hevitry ny teny amin' ny ankapobeny, ny fampiasana azy, ny fianarana azy sy ny fizotran' ny fiforonany, ary koa ny fahatakarana azy, ny fifandraisana amin' ny ankapobeny, ary ny fandikan-teny.

Na dia efa nodinihina hatramin' i Platôna sy i Aristôty ary koa tao amin' ny filôzôfian' ny Andro Antenatenany sy klasika aza ny olana filôzôfika ateraky ny fiteny, dia tondroina indrindraindrindra amin' ny hoe filôzôfian' ny fiteny, amin' ny maha sehatra manokana azy, ny filôzôfia analitika (miorina amin' ny lôjika ) izay nandroso tamin' ny taonjato faha-20, indrindra tao amin' ny filôzôfia anglô-saksôna.

Na izany aza, ny filôzôfia kôntinentaly (ao Eorôpa an-tanibe) dia tsy nandao ny sehatry ny fiteny, na dia namolavola fomba fiasa hafa aza, indrindra nianga avy amin' ny voan-kevitry ny hoe fifandraisan' ny saina amin' ny zavatra iantefany (anglisy: intentionality) ao amin' ny fenômenôlôjian' i Husser. Ny ôntôlôjia sy ny metafizika ary ny filôzôfian' ny fiteny dia mifamatotra, ary efa hatramin' i Parmenida, noho ny toa anondron' ny lahateny ny zava-misy. Ireo sehatra roa ireo, analitika sy kôntinentaly, dia nifandona, ohatra nandritra ny adihevitra teo amin' i Jacques Derrida sy John Searle na tamin' ny alalan' ny famolavolana teny fanoherana, nataon' i Hubert Dreyfus, tamin' ny fomba fiasa kômpotasiônalista (mampitovy ny fandinihana amin' ny kajy) natolotr' i Jerry Fodor.