Visigôty (vahoaka)
Ny Visigôty dia vahoaka jermanika nipoitra avy amin' ny vahoaka atao hoe Gôty. Ny Visigôty, toy ny Ôstrôgoty, dia sokajina ao amin' ny sampana ôstikan' ny vahoaka jermanika. Isan' ireo vahoaka barbariana nanana ny fahamboniany tao Eorôpa ny Visigôty, na noho ny tantara lavany izany sy ny fiaviany mifangaro fedrà, na noho ny sisan-kolontsaina navelany. Gôty nifindra monina avy amin' ny faritry ny Ranomasina Mainty ka niorim-ponenana tamin' ny taona 270-275 tao amin' ny faritany rômanan' i Dakia (Romania ankehitriny) izay tsy nisy mponina intsony, tao amin' ny Empira Rômana, fa ny Ôstrôgoty kosa nonina tany Sarmatia (Okraina ankehitriny). Nifindra monina indray mankany andrefana ny Visigôty nanomboka tamin' ny taona 376 sady tao amin' ny Empira Rômana Andrefana tao Hispania sy tao Akoitania. Ny Ôstrôgôty kosa niankandrefana taorian' ny fifindrà-monin' ny Visigôty ka nonina tao Italia. Rehefa nirodana ny Empira Rômana Andrefana tamin' ny taona 476 dia nanohy nitana anjara toerana lehibe tao Eorôpa Andrefana ny Visigôty.
Rehefa nonina tao amin' ilay faritany rômana taloha atao hoe Dakia io ny Visigôty hatramin' ny faran' ny taonjato faha-3 dia nandray tsikelikely ny arianisma (endriky ny kristianisma tsy mino ny maha Andriamanitra an' i Jesoa Kristy) nanomboka tamin' ny taona 341. Izany finoana izany dia nifanohitra amin' ny kristianisman' ny maro anisa tao amin' ny Empira Rômana tamin' ny nanombohan' ny Visigôty niorim-ponenana tao. Nanaraka ny arianisma (izay nataon' ny Fiangonana trinitariana hoe "finoan-diso" na "fampianaran-diso") ny Visigôty ka tsy nitsahatra izany raha tsy tamin' ny taona 589 tamin' ny niovan' ny mpanjaka Rekardo I (espaniôla: Recaredo) ho amin' ny trinitarisma tao amin' ny fanjakana visigôtin' i Espaina. Na dia izany aza dia nisy ny antoko ariana izay naharitra sy nahataona olona maro, indrindra teo amin' ny sarangan' ny andriana, ka tsy niafarana izany raha tsy tamin' ny fiandohan' ny taonjato faha-8 nahatapitra ny andron' io fanjakana io.