Mounir Aziz Daoud

I Mounir Aziz Daoud no misiônera evanjelista mpanorina ny Fiangonana Jesosy Mamonjy eto Madagasikara, teratany amerikana manam-piaviana irakiana. I Jane Collins, izay misiônera tahaka azy koa, avy any Texas Etazonia, no vadiny. Teraka tao Mosul any Iràka izy tamin' ny 6 Jona 1924, ary maty tamin' ny taona 2004 tao Antananarivo eto Madagasikara izy. Tao Ejipta no tena nahalehibe azy. Azo lazaina ho mpisava lalana tamin' ny fampidirana ny pentekôtisma eto Madagasikara izy.

I Mounir Aziz Daoud sy i Jane Collins vadiny tamin' ny taona 1963.

Mpitory Filazantsara mitety tany izy mivady, izay efa nanao asa fitoriana tany amin' ireo nosy Karaiba sy taty Afrika (tany Egipta, sns), tany Azia sns. Nanapa-kevitra izy ireo ny hanao fitoriana ny Filazantsara teto Madagasikara tamin' ny taona 1961. Nanao asa soa maro teto Madagasikara i Mounir Aziz Daoud sy i Jane Collins vadiny, nanangana fiangonana maro tamin' ny volany manokana, nanokatra sekoly, ary nampiasa ny volany sy ny fananany rehetra ho an' i Madagasikara tamin' ny androm-pahavelomany.

Tany ampita

Nanangana orinasa mpanota Baiboly tao Dallas Texas i Daoud sy ny vadiny Jane Collins Daoud dia ny International Bible Association (ilay atao hoe The Voice of Miracles and Missions tamin' ny voalohany), izay mandika sy mizara Baiboly amin' ny fitenim-pirenena maro.

Fanombohan' ny asany

Fitoriana filazantsara teny Fenoarivo

Teo amin' ny Stade des Cheminot Antananarivo no nanombohan' i Mounir Aziz Daoud mivady ny fitoriana ny Filazantsara. Rehefa hitan' ny Fanjakana malagasy fa nanelingelina ny fifamoivozana izany dia nakisaka teny amin' ny toerana famonoana omby eny Fenoarivo izany fitoriana izany. Tonga maro ny olona. Nalaza ny fandrenesana fanaovana fahagagana izay nampahiratra ny jamba, nanasitrana ny kilemaina, nampiteny ny moana, nampalady ny marenina, nampitsangana ny malemy, nanasitrana ny aretina, fanafahana ny olona azon' ny devoly. Maro ireo olona tonga ka nandoro ny odiny. Nitohy tany Toamasina koa izany fitoriana izany.

Fiorenan' ny Fiangonana Jesosy Mamonjy

Fiangonana Jesosy Mamonjy voalohany 1964

Nahazo tsindrimandry avy amin' ny Fanahy Masina i Daoud mivady ny Fanahy Masina ny amin' ny tokony hanorenana ny Fiangonana Jesosy Mamonjy eto Madagasikara tamin' ny taona 1963. Tao Ankorondrano Antananarivo no nanorenana ny trano fiangonana voalohany, izay mahazaka olona hatrany amin' ny 5 000, izay naitatra taty aoriana ka afaka nandray mpivavaka hatramin' ny 30 000 tamin' ny taona 1991.

Fandrosoan' ny asany

Nanoratra

Nanoratra boky i Daoud mivady, dia ny Boky Maintso (dikateny malagasy) sy ny Red Book (dikateny anglisy), izay mirakitra ny fampianarany sady manoro lalana amin' ny fomba hianarana ny Baiboly. Misy boky faha koa sy trakta maro nosoratan' izy mivady. Ny fihiràn' ny Fiangonana Jesosy Mamonjy dia nadika avy amin' ny fihiràn' i Jane Collins, dia ny Song Book, "Songs with a message", izay ahitana hira nangoniny sy nofantenana avy tamin' ireo hira fifohazana tranainy. Tamin' ny taona izy ireo dia namoaka ny gazetiboky Miracles and Missions Digest.

Fitaizana sy fanofanana

Niara-nisa tamin' ny vadiny i Daoud. Ramatoa Daoud no nanomboka sy nampita ny fomba fampianarana Sekoly Alahady, ny fampianarana hira ho an' ny ankizy mandritry ny fankalazana Noely. Hatramin' ny niorenan' ny Fiangonana Jesosy Mamonjy tamin' ny taona 1963 dia nanangana kilasy fampianarana hira fifohazana ireo tanoran' ny fiangonana i Jane Collins ary nanofana mpampianatra hira sy mpandika hira (hira amin' ny teny anglisy adika amin' ny teny malagasy) ihany koa, izay nahafahana nandrafitra tsikelikely ny boky fihiràn' ny fiangonana. Mahay mitendry zava-maneno isan-karazany ramatoa Daoud (angorodao, gitara, pianô) sady nampianatra ny fitendrena izany koa.

Fiafaran' ny fianany

Maty teto Madagasikara tamin' ny taona 1999 i Jane Collins ary tamin' ny taona 2004 kosa i Mounir Aziz Daoud. Nalevina teny amin' ny fasam-piangonana eny Soamanandray Ivato (akaikin' ny seranam-piaramanidina iraisam-pirenena) izy mivady araka ny hafany manao hoe: "Tsy alefa any Etazonia izahay rehefa miala ety, fa mijanona miaraka aminareo eto Madagasikara satria efa eto ny fonay".

Jereo koa

• Evanjelisma
• Evanjelisma eto Madagasikara
• Jane Collins (misiônera)