Herôda Antipasy

I Herôda Antipasy na Herôda Antipatera dia tetrarkan' i Galilea sy i Perea (faritra ao avaratra-antsinanan' ny Ranomasina Maty, ao atsinanan' i Jordàna) tamin' ny taona 4 tal. J.K. hatramin' ny taona 39 taor. J.K., zanak' i Herôda Lehibe sy ilay vehivavy samaritana atao hoe Maltake, vadiny fahefatra. Teraka tamin' ny taona 21 tal. J.K. izy ary maty tamin' ny taona 39 taor. J.K. Atao hoe Ἡρῴδης Ἀντίπατρος / Hêrôdês Antipatros izy amin' ny teny grika fa הורדוס אנטיפס kosa amin' ny teny hebreo.

I Herôda Antipasy no nanamboatra ny tananan' i Tiberiasy na Tiberiada izay miorina eo amorona atsinanan' ny farihin' i Galilea, mba ho fanomezany voninahitra ny emperora Tiberio.

Nanambady vehivavy nabateana atao hoe Fasaelisy, zanak' i Aretasy IV, mpanjakan' i Nabatea avy any Petra, i Herôda Antipasy, nefa nisarahany io mba hanambadiany an' i Herôdiada na Herôdiasy, zanaky ny rahalahiny atao hoe Aristôbola IV izay tsy iray reny aminy. Tamin' izany dia vadin' ny rahalahy tsy iray reny amin' i Herôda Antipasy, atao hoe Herôda Bôetôsy (atao hoe Herôda Filipo), i Herôdiada izay nandao an' i Herôda Bôetôsy mbola velona, ka niteraka fahatafintohinana izany ka nahatonga ady ara-tafika teo amin' i Herôda Antipasy sy i Aretasy IV rafozany. I Herôdiada no renin' i Salôme izay resahina ao amin' ny Evanjelin' i Marka (Mar. 6.14-29) fa antony nahatapa-doha an' i Joany Batista noho i Joany nitsikera izany fanambadian' i Herôda Antipasy an' i Herôdiada izany.

Resin' i Aretasy IV rafozany i Herôda Antipasy tamin' ny ady namoizany ny tafika nentiny. Nanolo-tsaina an' i Herôda Antipasy handeha any Rôma hangataka ny anaram-boninahitra mpanjaka amin' ny emperora Kaligola i Herôdiada. Naongan' ny emperora Kaligola izy tamin' ny taona 39 taor. J.K. Tezitra noho ny fanararaotam-pahefana nataon' i Antipasy ny Rômana ka tapa-kevitra ny hanao sesitany azy any antsimon' i Galia (latina: Gallia; mifanadrifindrify amin' i Frantsa ankehitriny) any Logdonoma (i Lyon any Frantsa ankehitriny izany). Nanaraka azy tany i Herôdiada.

I Herôda Antipasy no niandraikitra ny Tempoly tamin' i Jesoa nohelohina ho faty tao Jerosalema, tanàna ao Jodea izay tsy notapahin' ny Rômana mivantana. Araka ny Evanjelin' i Lioka (Lio. 23.7-15) dia tany amin' i Herôda Antipasy no nandefasan' i Pôntio Pilato an' i Jesoa.