Fivavahana ao Indônezia
Ny fivavahana ao Indônezia dia maro samihafa nefa tsy manana fivavaham-panjakana ity firenena ity. Ny foto-pitsipika voalohany amin' ny fototra filôzôfikan' i Indônezia, atao hoe Pancasila, ("foto-pitsipika dimy") dia mitaky amin' ny olom-pireneny hanambara ny finoany an' "Andriamanitra tokana sy mahery indrindra". Miantoka ny fahalalahan' ny fivavahana ny andininy faha-29 amin' ny lalàmpanorenana tamin' ny taona 1945 ary tsy misy fivavahana omeny vahana. Ambonin' izany dia tsy manondro fivavahana iray manokana ny lalàmpanorenana. Heloka mahavoasazy (nanomboka tamin' ny taona 1965) ny blasfemia (fitenenan-dratsy an' Andriamanitra) ary manana toe-tsaina manavakavaka manoloana ny olom-pirenena manaraka ny fivavaham-poko maro ao Indônezia sy ny Ateista (tsy mino an' Andriamanitra) ary ny Agnôstika ny governemanta indôneziana. Fanampin' izany dia mampihatra amin' ny fomba ôfisialy ny lalàna silamo Sharia ny Faritanin' i Aceh ary malaza amin' ny fanavakavahana atao amin' ny vitsy anisa ara-pivavahana sy ara-pananahana.
Fivavahana maro samihafa no arahin' ny olona ao amin' ilay firenena, ary manan-danja tokoa izy ireo eo amin' ny fiainana ara-pôlitika sy ara-toekarena ary ara-kolontsaina ao amin' ilay firenena. Na dia eo aza ny fiantohan' ny lalàmpanorenana ny fahalalahana ara-pivavahana dia tsy manaiky afa-tsy fivavahana enina ny governemanta nanomboka tamin' ny taona 1965: ny silamo, ny kristianisma (katôlisisma, atao hoe "Katolik", ary prôtestantisma, atao hoe "Kristen" dia ekena misaraka), ny hindoisma, ny bodisma ary ny kônfosianisma. Tamin' io taona io ihany dia nilaza ny fitondram-panjakana indôneziana fa tsy handrara ny fivavahana hafa, ka nanonona manokana ny jodaisma, ny zôrôastrisma, ny sintôisma, ary ny taôisma ho ohatra.
Araka ny fanapahan-kevitry ny Fitsarana momba ny Lalàmpanorenana any Indônezia tamin' ny taona 2017 dia tsy maintsy ekena sy ampidirina ao anatin' ny kara-panondro indôneziana (KTP) "ny sampam-pinoana" arahin' ny tena (indônezianina: aliran kepercayaan) – ny fivavaham-poko miaraka amin' ny hetsika ara-pivavahana vaovao. Araka ny angon-drakitry ny Kônferansa Indôneziana momba ny Fivavahana sy ny Fandriam-pahalemana dia misy fivavahana tsy ôfisialy miisa 245 eo ho eo ao Indônezia.
Nanomboka tamin' ny taona 1975 ka hatramin' ny 2017, dia nandidy ny olom-pireneny hanana kara-panondro manondro ny fivavahany, izay azo fantenana ao amin' ny fivavahana enina eken' ny fanjakana. Na izany aza, nanomboka tamin' ny taona 2017, ny olom-pirenena izay tsy manaraka ireo fivavahana ireo dia manana safidy hamela ho banga ny faritra tokony hisy izany ao amin' ny kara-panondrony. Na dia tsy misy ny lalàna momba ny fivadiham-pinoana (apôstazia) manakana ny Indôneziana tsy hiova finoana, dia tsy manaiky ny agnôstisma sy ny ateisma i Indônezia, ary heverina ho fandikan-dalàna ny fitenenan-dratsy an' Andriamanitra (blasfemia).
Araka ny angona avy amin' ny Minisiteran' ny Atitany indôneziana tamin' ny taona 2023 dia 87,06 % amin' ny Indôneziana no nilaza fa Mozilmana (ka eo amin' ny 99 % ny Sonita ary eo amin' ny 1 % ny Siita), 10,47 % ny Kristianina (7,41 % ny Prôtestanta, 3,06 % Katôlika Rômana), 1,68 % ny Hindo, 0,71 % ny Bodista, 0,03 % ny Kônfosiana ary 0,05 % ny hafa.