Tobilehibe Soatanàna

Ny Tobilehibe Soatanàna dia tobim-pifohazana miorina eto Madagasikara, sady tobim-pifohazana voalohany eto amin' ny Nosy, izay naorin' i Rainisoalambo, ao amin' ny tanànan' i Soatanàna. Ity toby ity no foiben' ny Fifohazana Soatanàna izay misandrahaka manerana an' i Madagasikara sady ao amin' ny Fiombonan' ny Fiangonana Protestanta eto Madagasikara (FFPM), mirafitra amin' ny Fiangonana Loterana Malagasy (FLM). Tobilehibe ny tobim-pifohazana Soatanàna, ka noho izay dia manana toby hafa maro izay miankina aminy manerana an' i Madagaskara. Ny 9 Jolay no andro manan-danja amin' ity toby, izay lazaina fa nilatsahan' ny Fanahy Masina. Ny 10 Aogositra kosa no andro anaovana fotoam-pivoriana andaminana momba ny asam-pifohazana.

Toerana misy ilay toby

Miorina ao Soatanana, izay kaominina ao amin' ny distrikan' i Fianarantsoa II, ao amin' ny tapany afovoan' ny faritra Matsiatra Ambony, ny Tobilehbe Soatanàna. Ny ankamaroan' ny mponina (95 %) dia mpiompy sy mpaboly (indrindra vary sy ny voanjo, ary eo ny katsaka sy ny mangahazo ary ny vomanga). 51 km miankandrefana somary minatsimo kely no misy an' i Soatanàna.

Ny mpanorina ny toby

I Rainisoalambo no nanorina ny tobiehibe Soatanàna. Teraka tao Ambalavato Ambatoreny tamin' ny taona 1839 izy. Mpamboly sy mpiompy izy. Nandimby ny asan-drainy, izay izay mpitaiza zanak' andriana (atao hoe marambasia) tao Isandra, i Rainisoalambo. Voafehiny ny raokandro malagasy ary nitety tanàna nivarotra ny odiny izy.

Niditra fiangonana i Rainisoaambo mba hianatra mamaky teny ary natao batisa sady tonga katekista taty aoriana, nefa tsy nanary ny odiny. Nanao vavaka fitarainana izy tamin' ny alin' ny 14 Ôktôbra 1894 rehefa tratran' ny aretina tsy hay sitranina, ka nahita fahazavana lehibe ahita an' i Jesosy niakanjo fotsy lava teo akaikiny, izay nampanary ny odiny raha te ho sitrana. Nandoro ny odiny izy ary sitrana. Nomboka teo ny tena fiovam-pony ho kristiana tokoa.

Nanomboka nitory ny Filazantsara izy taorian' ilay fahasitranana. Nitarika mpino maro hafa naira-niasa taminy izy. Niala avy tao Ambatoreny nankany Soatanàna ny fifohazana notarihin' i Rainisoalambo tamin' ny taona 1901.

Fitsipika ao amin' ny toby

Ny teny fiarahabana sy fanaovam-beloma dia ny hoe: Akory Tompoko ô! sy Veloma Tompoko ô!.

Misaron-doha fotsy ny lehilahy rehefa hanao fampaherezana sy fandroahana demonia fa ny vehivavy kosa tsy misaron-doha. Olona iray ihany no miteny mafy ka mandidy ny demonia mba hivoaka amin' ny anaran' i Jesosy Kristy, ary mandritra ny fotoan' ny fampaherezana dia tsy mahazo mihira ny olona fa mivavaka am-po. Tsy maintsy fotsy ny fitafian' ny fifohazana mba ho mariky ny fahadiovana sady taratry ny fahamasinan' ny fanahy.

Ny "jentilisa" mbola tsy mibebaka sy ny olona voaongana niala amin' ny Fiangonana ary ny olona manao tokantrano imaso dia tsy ametrahan-tanana raha tsy efa nifampidinihana tamin' ny mpitondra fiangonana.

Ny mpiandry vehivavy dia manao bango volo tananivoho (soritana hizara roa mitovy ny volo, randranina, ary afatotra ao an-katoka).

Ny tendrombohitra Fiadanana

Eo atsinanan' Ambatoreny no misy ny tendrombohitra Fiadanana izay nataon' i Rainisoalambo ho toerana voatokana hivavahana tsy an-kijanona amin' ny Tompo izay ninoany fa manatrika azy eo amin' io toerana io. Lasa toerana masina fitokanam-bavaky ny Mpianatry ny Tompo io taty aoriana. Ankehitriny dia mbola miakatra eny amin' ny tendrombohitra Fiadanana ny Mpianatry ny Tompo mba hitokam-bavaka.

Jereo koa

• Fifohazana (kristianisma malagasy)
• Tobilehibe Manolotrony
• Tobilehibe Ankaramalaza
• Tobilehibe Farihimena