Tanibetro
Ny tanibetro na tany betro dia poti-tany sy ny potipoti-javatra ôrganika entin' ny rano sy apetrany eo amin' ny lalan' ny renirano na eny amoron-drenirano, akora misy ventiny manana habe eo anelanelan' ny an' ny fasika sy ny an' ny tanimanga, izany hoe eo anelanelan' ny 2 sy 63 mikrômetatra.
Ny fiaviany mineraly amin' ny ankapobeny dia vatokaranana (na koaritsa), ny feldspata, ny eladrano (na mikà) na ny mineraly misy tanimanga mihitsy aza. Ny tanibetro no vokatry ny fahapotehan' ny vato noho ny fikaoka ataon' ny rano amin' ny sahan-drenirano. Satria matetika mitsingevana ao anaty rano ny tanibetro, dia mandray anjara amin' ny fahamatrohany. Mampiavaka ny angona lœss entin' ny rivotra, antsoina koa hoe "tanibetron-dembalemba", ary fahita any amin' ny angon-dilatra, ny tanibetro. Amin' ity tranga farany ity dia mamoaka singa tena tsara ho an' ny fanavaozana ny fahavokaran' ny nofon-tany sy ho an' ny fitrandrahana izany amin' ny fambolena ny potika tanibetro.
Mety hitranga amin' ny endrika nofon-tany (matetika mifangaro amin' ny fasika na tanimanga) na toy ny dilatra mitsingevana mifangaro amin' ny rano ao amin' ny velaran-drano toy ny renirano ny tanibetro. Mety misy ihany koa ny tanibetro amin' ny endrika nofon-tany miangona amin' ny fanambanin' ny toerana misy rano betsaka, toy ny hita amin' ny fikorian' ny fotaka avy amin' ny fihotsahan' ny tany.
Manana velarana isan-danja antonontonony sy plastika amin' ny ankapobeny tsy miraikitra toy ny dity ny tanibetro. Toy ny lafarinina raha tsapaina sy raha maina, ary malama rehefa lena ny tanibetro amin' ny ankapobeny. Ny tanibetro jerena amin' ny fanalehibeazan-jery dia manana endrika mamirapiratra.