Nimo

Ny nimo dia hazo teratany any India, ao amin' ny fianakaviana Meliaceae. Avy amin' ny teny bengaly hoe নিম / nim io anarany amin' ny teny malagasy io. Ny anarany ara-tsiansa dia Azadirachta indica. Iray amin' ny karazana roa ao amin' ny vondron-karazana Azadirachta izy io ary teratany ao amin' ny Zana-kôntinenta Indiana (India, Nepaly, Pakistàna, Bangladesy ary Srilanka). Amin' ny ankapobeny dia afaka maniry any amin' ny faritra mafana izy io. Ny voany sy ny vihiny no akana ny menaka nimo.

Amin' ny teny frantsay izy dia atao hoe margousier na margosier, fa amin' ny teny anglisy kosa dia

Ny mombamomba azy

Nimo any amin' ny Fankakan' i Maharashtra any India

Ny nimo dia hazo mitombo haingana, izay mahatratra 20 m ny haavony, ary mahalana kokoa ny 35 ka hatramin' ny 40 m. Maitso foana ny raviny, saingy mety hihintsana amin' ny haintany na aretina mafy. Malalaka sy mivelatra ny sampany. Ny vondron-dravina somary matevina dia boribory ary mety hahatratra 15-20 m ny savaivony amin' ny hazo tantitra.

Ny raviny dia mirefy 20 ka hatramin' ny 40 sm ny halavany, miaraka amin' ny zana-pelana maitso matroka miisa 20 hatramin' ny 30 izay manana halava 3 ka hatramin' ny 8 sm. Matetika no tsy misy ny zana-pelana farany. Fohy ny tangozan-dravina.

Vonin' ny nimo

Mipoitra amin' ny volana Janoary ka hatramin' ny Mey any amin' ny faritra mafana ny voniny fotsy sy mamerovero. Izy ireo dia mipetaka eny amin' ny katsaoka fanampiny mitsotsorika mirefy hatramin' ny 25 sm. Ny vondrombony, izay misampana hatramin' ny ambaratonga fahatelo, dia mitondra voninkazo 150 hatramin' ny 250. Ny voninkazo tsirairay dia manana halava 5-6 mm sy sakany 8-11 mm.

Voa-nimo manta

Hodi-nimo

Ny voany dia mitovitovy amin' ny an' ny ôliva, manana halava eo amelanelan' ny 1,4 sy 2,8 sm sy savaivo 1,0 hatramin' ny 1,5 sm. Ny hoditra ivelan' ny voany dia manify sady misy nofony (hoditra afovoany) mamy-mangidy izany fotsy manopy mavo ary tena misy tsiraka. Ny hoditra afovoany dia manana hateviny 0,3-0,5 sm. Ny hoditra anatiny fotsy sy mafin' ny voankazo dia misy vihy iray, mahalana roa na telo, lavalava miaraka amin' ny fonom-bihy miloko volontany.

Fampiasana azy

Any India, ny ravin' ny nimo dia hamainina ary apetraka ao anaty vata misy lamba mba hisakanna ny bibikely tsy hihinana ny fitafiana, sy ao anaty vata fitehirizam-bary. Manampy amin' ny fandroahana moka ny fandoroana ny raviny maina.

Rehefa lehibe ny hazo nimo dia afaka mamokatra voany hatramin' ny 50 kg, izay ahazoana vihiny milanja 30 kg; ireo no tena loharanon' ny fitambarana singa famonoana bibikely, anisan' izany ny azadiraktinina (C₃₅H₄₄O₁₆). Ny herin' ny azadiraktinina dia mora lefin' ny hazavana.

Ny azadiraktinina dia manakana ny fivoaran' ny olitra ho bibikely lehibe, sady mahatonha ny fandevonan-kanina ao amin' ny olitra tsy hiasa. Betsaka azadiraktinina, ny menaka azo avy amin' ny voan' ny nimo izay ampiasaina ho toy ny fanafody kankana, saingy misy poizina lehibe ho an' ny olombelona. Ity menaka ity, izay antsoina hoe menaka nimo, dia azo avy amin' ny famiazana mangatsiaka ny voa. Tokony hatao ny fanadiovana mba hahazoana vokatra tsara kalitao. Ny habetsahan' ny azadiraktinina ao anaty voa dia miovaova be arakaraka ny toetrandro, ny toetry ny nofon-tany ary ny toetran' ilay hazo. Ny hazo iray dia mety mamokatra azadiraktinina miovaova hanetsahana isan-taona. Nasehon' ny manam-pahaizan fa tsy ny azadiraktinina irery no akora miasa ao amin' ny nimo.

Any Soisa, ny azadiraktinina avy amin' ny nimo dia nahazo fankatoavana amin' ny fambolena biôlôjika hamonoana bibikely sy Acarina, manohitra ny Aphidoidea sy bibikely mpanimba fambolena fihinam-boa sy legioma. Na izany aza dia heverina ho mampidi-doza ho an' ny tontolo anaty rano ny azadiraktinina.