Limbo
Ny limbo, ao amin' ny foto-pampianarana katôlika, dia toe-javatra any an-koatra izay eo an-tsisin' ny fonenan' ny maty. Amin' ny heviny miitatra dia manondro ny toe-javatra anelanelany sy manjavozavo ao amin' ny tontolon' ny maty izany. Amin' ny teny latina izany dia tao hoe limbus. Tsy hita ao amin' ny Baiboly sady tsy hita koa ao amin' ny soratry ny Aban' ny Eglizy (na Rain' ny Fiangonana) ny hoe limbo. Tamin' ny taonjato faha-13 io fampianarana io no nipoitra tao amin' ny fiheverana skôlastika, izay manavaka limbo roa, dia ny limbon' ny patriarka (latina: limbus patrum) sy ny limbon' ny zazakely (latina: limbus puerorum).
Karazana limbo hanova
Ny limbon' ny Patriarka hanova
Ny limbon' ny Patriarka dia toerana andraisana ny fanahin' ny olo-marina maty talohan' ny fitsanganan' i Jesoa Kristy tamin' ny maty. Mifandray amin' ny "tratran' i Abrahama" resahina ao amin' ny Evanjelin' i Lioka (Lio 16.22) izany. Ireo fanahy ireo, izay tsy afaka miditra any am-paradisa voahidy sy voatombokase hatramin' ny nanotan' i Adama sy i Eva, dia nafahan' i Jesoa tamin' ny nidinany tany amin' ny fitoeran' ny maty teo anelanelan' ny Zoma Masina sy ny andron' ny Paka (na Paska). Ny lovantsofina skôlastika dia miorina amin' ny Taratasy voalohany nosoratan' i Piera (1Piera 3.19), izay milaza ny "nandehanany [i Jesoa] nitory teny tamin' ny fanahy tao an-tranomaizina". Maro ny fitantarana sy lahatsoratra tamin' ny Andro Antenatenany izay nanampy amin' ny fitantarana ny fijalian' i Kristy ny fidinany tany amin' ny fonenan' ny maty (na fiainan-tsy hita).
Ny libon' ny zazakely hanova
Ny limbon' ny zazakely dia toerana andraisana ny fanahin' ny zazakely maty talohany hanaovana batemy (na batisa) azy. Izany fampianarana izany dia valin-teny teôlôjika amin' ny fanontaniana momba ny hoavin' ireo fanahy ireo, izay tsy mendrika ny afobe, nefa tsy tafiditra ao am-paradisa noho ny fahotana tamin' ny fototra. Izany fanontaniana izany, izay efa nitranga tamin' ny vanim-potona voalohany nisian' ny fivavahana kristiana, dia nahazo valiny manjavonjavo avy amin' ny Aban' ny Eglizy toa an' i Gregôriôsy avy any Nisa sy Gregôriôsy avy any Nazianzôsy.