Koraisa
Ny Koraisa dia fokom-pirenena arabo nonina sy nifehy ny tanànan' i Meka sy ny Kaaba, izay atao amin' ny teny arabo hoe قُرَيْشٌ / Quraysh. Atao hoe Koraisita ny olona ao amin' ity foko ity. Ny mpaminany silamo Mohamady dia teraka tao amin' ny fokom-pianakaviana Hashim izay anisan' ny ao amin' ny Koraisa. Tamin' ny taona 600 taor. J.K. dia mpivarotra nanan-karena ilay fokom-pirenena, izay nifehy ny raharaham-barotra teo anelanelan' ny Ranomasimbe Indiana sy i Afrika Atsinanana an-daniny, sy i Mediteranea an-kilany. Nikarakara diabe nankany Gaza sy Damaskôsy izy ireo amin' ny fahavaratra ary nankany Iemena amin' ny ririnina. Teny amin’ ireo lalana ireo ihany koa no nanaovan' izy ireo fitrandrahana harena an-kibon’ ny tany sy nisahanany fandraharahana hafa. Nahafantarana azy ireo ny hilm, na ny "tsy fisian' ny firehetam-po”, satria, na dia eo aza ny fifampiandaniana dia nataony loha laharana ny tombontsoa ara-barotra sy ny firaisana.
Rehefa nampiely ny finoana silamo, izay fivavahany, tao Meka i Mohamady dia tsy niraharaha izany izy ireo ary tsy nanohitra mafy azy raha tsy nanomboka nitsikera mafy ny fivavahan' izy ireo amin' andriamanitra maro (pôliteisma) ilay mpaminany. Rehefa niharatsy ny fifandraisana tamin' ny Koraisita dia nentin' i Mohamady ho any Medina ny mpanaraka azy taorian' ny fifampiraharahana nahomby tamin' ny fokom-pirenena Bano Aosa (Banu Aws) sy Kazrajy (Khazraj) mba hanelanelana ny adim-pokon' izy ireo. Fantatra amin' ny anarana hoe Hijrah ity fifindra-monina ity. Tany Medina i Mohamady dia nanafika ny diaben' ny Koraisita sy nandroba ny entany. Izany dia nitarika ady mitam-piadiana teo amin' izy ireo, anisan' izany ny ady tao Badr sy ny tao Uhud ary ny ady anaty hady. Fotoana fohy taorian' ny ady farany sy taorian' ny nandresen' i Mohamady soa aman-tsara ny fokom-pirenena jiosy telo lehibe tao Medina dia voalaza fa nijanona tsy nanafika ny diaben' ny Koraisita izy, tamin' izay fotoana izay dia nifantoka bebe kokoa tany avaratra izy, nanafika ny fokom-pirenena Bano Lihiama (Banu Lihyam) sy Bano Mostalika (Banu Mustaliq), raha tsy holazaina afa-tsy ireo vitsivitsy ireo fotsiny.
Rehefa nandeha ny fotoana, rehefa marin-toerana kokoa i Mohamady tao Medina, dia nanjary nankasitraka kokoa azy ny mponina tao amin' io tanàna niaviany io. Vita avy eo ny Fifanekena tao Hudaybiyya, izay hampitsaharana ny ady amin' ny Mekana mandritra ny folo taona, ary afaka nanao fivahiniana masina kely (arabo: عُمْرَة / Umrah) tao an-tanàna i Mohamady tamin' ny taona nanaraka. Raha tany Meka no nanaovany Umrah, i Mohamady dia nahavita nifanaraka tamin' ny fokom-pianakaviany, ny Hashim, izay nofehezina tamin' ny fanambadiany an' i Maymuna bint al-Harith. Maro amin' ny olo-malaza tao Meka, toa an' i Khalid ibn al-Walid sy Amr ibn al-As, no nanaiky azy ho ilay lehilahin' ny hoavy ao Arabia ary niova ho amin' ny finoana silamo izy ireo.
Tamin' ny fiafaran' ny taona 629 dia nisy antoko mpiady — nanohitra ny torohevitr' i Abu Sufyan, izay lehiben' ny Koraisita tamin' izany fotoana izany — izay nanohana ny iray tamin' ny fokom-pirenena mpanompo hanohitra ny fokom-pirenena Khuza'a, izay mpiara-dia amin' i Mohamady. Tokony ho noheverin' ny roa tonta ho fanitsakitsahana ny fifanarahana voalaza teo aloha izany. Rehefa nitondra ny tafiny hanao fahirano ny tanànan' i Meka i Mohamady dia nandeha nitsena azy i Abu Sufyan sy ny olona hafa, anisan' izany i Khuza'i Budayl ibn Warqa, naman' i Mohamady, mba hangataka famotsoran-keloka ho an' ny Koraisita rehetra izay tsy nanao fanoherana mitam-piadiana. Afaka niditra tao Meka tsy nisy nanohitra i Mohamady, ary saika niova finoana mozilmana avokoa ny mponina tao. Taorian' izay dia nifindra tamin' ny mpikambana iray anisan' ny Koraisita ny fitarihana ny Mozilmana, toy ny tamin' ny Kalifata Rasidona, Omeiada, Abasida ary angamba koa ny Fatimida.