Kinana
Ny kinana dia zavamaniry amin’ ny tany manana toetanin-jana-pehin-tany ao amin' ny fianakaviana Euphorbiaceae. Izy no ahazoana ny menaka kinana, izay ampiasaina amin’ ny fomba isan-karazany, misy poizina koa izy. Matetika izy io no ambolena mba hanaingoana tanàna na trano. Ricinus communis no anarany ara-tsiansa ary izy no hany karazana amin' ny vondron-karazana Ricinus.
Anarany hanova
Indreto koa ny anarana mety hiantsoana azy amin' ny teny malagasy: fampinonoana, fampivalanana, kimanga, kinamena, kinana, kinanamena, tanantanamanga, tanatana, tanatanamanga, tanatanamena, tanatanankisoa, tseroka[1].
Toetoetrany hanova
Miseho amin' ny endrika ahitra na hazomadinika ny kinana, maniry isan-taona na maharitra arakaraka ny toetany amin' ny faritra aniriany. 1 ka hatramin' ny 13 m ny haavony.
Ny raviny dia tahaka ny ratsan-tanana (5 ka hatramin' ny 12 ny fisampanany), eny amin’ ny taho lava. Maitso na mena izy ireo. Ny karazana fanaovaa haingon-tanàna sasany dia misy raviny miloko mena ny ambany.
Mivondrona ny voniny ka ny vony vavy eo ambony ary ny vony lahy eo ambany. Amin' ny fahavaratra ny kinana no mamony.
Misy hodiny misy tsilotsilo (indraindray tsy misy) ny voany. Mamirapiratra ny vihiny, miloko mena na manja, misy tsipika misongadina sahala vombony. Misy menaka 40 % hatramin’ ny 60 % izay misy trigliserida ny voan’ ny kinana. Ny karazana manana voa lehibe kokoa ihany no ampiasaina amin' ny famokarana menaka, fa ny voa madinika dia matetika tsy tsara hahazoana menaka.
Faritra aniriany hanova
Avy any amin’ ny faritr’ i Afrika manana toetanin-jana-pehin-tany ny kinana, ary niely manerana izao tontolo izao, amin’ ny faritra manana toetany mafana. Any amin' ny firenena mafana maro any Arabia, any Azia, aty Afrika ary any Amerika no ambolena azy mba hahazoana menaka. Hita any amin’ ny faritra manana toetany ambanin' ny zana-pehin-tany koa izy.
Ankehitriny dia hita any amin' ny faritra manana toetany antonony ny kinana, atao haingon-tanàna na haingon-trano.