Antrendry (maniry)

Ny antrendry dia zavamaniry any amin’ ny faritra manana toetanin-jana-pehin-tany avy any Afrika Avaratra sy avy any Azia Atsimo-Atsinanana ary any India, volena manerana izao tontolo izao any amin’ireo faritra manana toetany mafana sy maina. Phoenix dactylifera, ny anarana ara-tsiansan’ ny antrendry.

Toetoetran' ny antrendry

Ny fototr' antrendry

Miavaka amin’ ny zavamaniry hafa ny antrendry noho ny fananany vatana mahitsy sady lava mahatratra 15 m hatramin’ ny 30 m, sy ny fananany ravina mivondrona toy ny volom-borona manodidina ny izany vatany izany.

Lehibe ny raviny izay miloko maitso mavana, miraikitra amin’ ny vatany amin’ny alalan’ ny taho-dravina afovoany, sady mivelatra sady manana halava maharatra 3 m hatramin' ny 7 m.

Ny vonin' ny antrendry

Mety ho lahy na vavy ny fototr’ antrendry iray, ka ny fototr’ antrendry lahy no misy ny lahim-bony, fa ny fototr' antrendry vavy no mitondra ny vavim-bony. Afaka 6 hatramin' ny 8 taona anefa vao fantatra raha lahy na vavy ny fototr' antrendry iray. Ny rivotra no miantoka ny fitondrana ny lahim-bony eny amin' ny vavimbony, nefa azo tapahina ny vonin’ ny antrendry lahy raha mbola tsy matoy dia ahantona eny amin’ ny vonin’ ny antrendry vavy mba hahamora ny fitsimohan’ny voan’ antrendry.

Ny voan' antrendry

Voan' antrendry

Voan' antrendry masaka

Ny fitambaran’ ny voan’ ny fototr’ antrendry iray mandritra ny iray taona dia mety mahatratra 270 kg. Amin’ ny  fahavalo taonany ny antrendry dia manomboka misy voany, tonga lehibe izy amin’ ny fahatelompolo taona ary tsy antitra raha tsy any amin’ny fahazato taonany any ho any. Ny antrendry vavy iray dia mety ahitana tangorom-boany maro ary ny tsirairay amin' izany dia ahitana voany miisa 200 hatramin’ ny 1 000, izay mety milanja hatrany amin’ ny 12 kg.

Karazan' antrendry

Alan' antrendry

Maro karazana ny antrendry ka isan’ izany ny antrendry mamy (Phoenix sylvestris), ny antrendry manga (Phoenix eylanica) ary ny antrendry zeny (Phoenix roebelenii). Mahazaka hatsiaka (hatramin' ny - 12° C) sy haintany ny antrendry Phoenix dactylifera.

Ny fampiasana ny antrendry

Ny voany

Ny voan’ antrendry dia famenon-tsakafo mahavelona any amin’ ny faritr’ i Afrika Avaratra sy any Iràna ary any Arabia. Misy siramamy ny 58 % ary lipida ny 2 %n’ ny voan’ antrendry sady ahitana prôteinina sy sira mineraly koa. Ny antrendry mamy dia volena any India mba hahazoana ranony izay andrahoina mba hahazoana siramamy; raha tsy andrahoina izany dia ahazoana zava-pisotro na divay na toaka.

Ny vatany sy ny raviny

Ny tahon-draviny dia azo rarena na zairina hanamboarana harona, sahafa, tsihy, kidoro, kitapo, sns. Ny tsiratsiraka amin’ ny raviny dia azo anamboarana tady. Ny antrendry koa dia volena mba hatao haingon-tanàna any amin’ireo faritra mangatsiaka loatra ka tsy afaka mahamasaka ny voany. Misy koa ny antrendry zeny izay volen’ ny olona anaty trano hatao haingon-trano.

Jereo koa

• Voaniho
• Antrendry (voany)