Hanokatra ny renilisitra

Ny hoe Andro Taloha dia ilazana vanim-potoan'ny Tantara izay nialoha ny Andro Antenantenany na ny Andro Vaovao. Miovaova ny fivelaran'io vanim-potoana io arakaraka ny sivilizasiona heverina. Amin'ny tantara eoropeana dia fotoana mifanandrify amin'ny sivilizasionan'ny soratra nanodidina ny Ranomasina Mediteranea ny Andro Taloha ka ny ankamaroan'ny mpahay tantara dia mametraka ny fiantombohany eo amin'ny taonarivo faha-4 tal. J.K. (anelanelan'ny taona 3500 tal. J.K. sy 3000 tal. J.K.) miaraka tamin'ny famoronana ny soratra tany Mesopotamia (ny soratra miendri-pantsika.) sy tany Egipta. Nanova tanteraka ny tantaran’ny olombelona ny fahitana ny soratra izay nitranga tamin’ny taona 3300 tal. J.K. Ny fiafaran'ny Andro Taloha dia heverin'ny mpahay tantara ho manodidina ny taonjato faha-5 taor. J.K. (anelanelan'ny taona 300 sy 600).

Tamin’ny taona 476 taor. J.K. dia rava ny empira farany tamin’ireo lehibe tamin’izay nisy manodidina an’i Mediretanea, tsy iza izany fa ny Empira romana. Izany faharavàn’ny Empira romana izany dia nahatapaka tanteraka ny tantaran’ny tandrefana nefa tsy nisy vokany tamin’ny tantaran’ny faritra hafa eto amin’izao tontolo izao.

Manodidina an'i Mediteranea sy tany EoropaHanova

Tao amin’ny faritra manodidina an’i Mediteranea no fantatra indrindra tamin’ny tontolon’ny Andro Taloha satria tao no nahitana ny Mesopotamiana sy ny Egiptiana, ny Persiana, ny Grika, ary ny Romana.

Ho an'ireo tsy mihevitra afa-tsy ny sivilizasiona eoropeana dia ny vanim-potoan'ny sivilizasiona grika sy romana ihany no Andro Taloha (Andro Taloha grika-romana) izay nanomboka tamin'ny taona 2000 tal. J.K. ka niafara tamin'ny faharavan'ny Empira romana any Andrefana tamin'ny taona 476.

Ny vahoaka nonina tao Eoropa tamin’ny Andro Taloha dia ny Kelta izay antsoina hoe Galý raha nonina tamin’ny faritra misy an’i Frantsa sy i Belzika ary i Soisa amin’izao fotoana izao.

Andro Taloha tao AmerikaHanova

Ho an'ny Kontinentan'i Amerika dia mifamatotra amin'ny sivilizasiona prekolombiana ny Andro Taloha ka noho izany dia nanomboka manodidina ny taona 1200 tal. J.K. tamin'ny namoronan'ny Olmeka ny soratra maneho sary sy hevitra (piktograma sy ideograma) ary nifarana tamin'ny fiantombohan'ny taonjato faha-16 tamin'ny fahatongavan'ny Eoropeana voalohany tany Amerika, ka tsy misy ny atao hoe Andro Antenantenany fa tonga dia arakarahin'ny Andro Vaovao ny Andro Taloha. Maro ireo vahoaka niaina tao Amerika, dia ireo atao hoe Indianan'i Amerika izay niaina talohan'ny nahitan'i Kristoforo Kolombo tamin'ny taonjato faha-15 taor. J.K.

Ny Olmeka, dia nanorina fanjakana midadasika, azo lazaina hoe empira, izay nanorim-ponenana tao amin’i Meksika amin’izao fotoana izao.

Andro Taloha tany AziaHanova

Tany Azia dia maro ireo sivilizasiona matanjaka nivoatra tamin’ny Andro Taloha, ka ny fantatra indrindra amin’izany dia ny sivilizasiona sinoa, ny sivilizasionan’i Indosy (any India). Ny Andro Taloha ho an'ny tantaran'i Azia dia nifarana tamin'ny taona 200 tal. J.K. niaraka tamin'ny fanjakana ifandovan'ny taranaka Qin izay nanokatra ny vanimpotoan'ny Empira tao Sina. Tao India atsimo (sivilizasionan'i Indosy) dia tsy tena hita loatra io teteza-mita io izay mifanandrify amin'ny fanombohan'ny fanjakana ifandovan'ny taranaka Chola, fa tao India avaratra kosa dia nifanandrify tamin'ny faharavàn'ny fanjakan-dehibe Kosàna tamin'ny taona 230 taor. J.K. eo ho eo izany, izay nanombohan'ny fotoana tsy nampiharana firy ny atao hoe Andro Taloha raha ny amin'ny firesahana ny fifandraisana amin'ny tontolo taloha, dia i India Avaratra (Maurya sy Shunga), i Grisia nanjakan'ny sivilizasiona helenista sy romana, ny Parta (na Partiana) sy ny Iraniana taloha. Izany fisarahana mazava izany dia hamafisin'ny fisandratan'ny fanjakan-dehiben'i Gopta tamin'ny faramparan'ny taonjato faha-3.

Nanana ny sivilizasionany koa ny Japoney tany aloha nefa efa taty aorian’ny Andro Taloha izany ka ny Andro Antenantenany any Andrefana no mifanandrify amin’ny vanimpotoana nisehoany.

Jereo koa:Hanova