Fanalana faditra
Ny fanalana faditra na ala faditra dia karazana sorona tanterahina mba hanesorana ny zava-dratsy na ny vokatr' izany tsy hihatra amin' ny tena, amin’ ny alalan' ny fitondrana zava-manana aina na tsy manana aina; na amin’ ny alalan’ ny tsy fanaovana na tsy fitondrana na tsy fametrahana ao an-trano na ao an-tanàna zavatra voatondro manokana, arakaraka ny fototry ny zava-dratsy mahazo ny tena.
Ny faditra tian-kalàna hanova
Ny faditra dia ny zavatra ratsy mahazo na mety hahazo ny tena, izay vokatry ny vintana ratsy na ny zavatra nataon’ ny sasany amin’ ny tena (toy ny mosavy na vorika). Esorina na sorohina amin' ny alalan’ ny fombafomba efa raikitra ny faditra ka izany no atao hoe "ala faditra". Raha mikasika ny vintan-dratsy manokana ny ala faditra dia atao hoe "fanalana vintana". Raha faditra mifandray amin' ny andro ao amin' ny herinandro (Alatsinainy, Talata, sns) kosa no halana dia atao hoe "fanalana faditra andro". Ny zavatra ratsy (ohatra: vintan-dratsy) akana fadira na ifadirana fa ny zavatra tsara kosa (ohatra: vintana tsara) isoronana.
Ny fanalana faditra dia tanterahina:
- amin' ny alalan' ny fitondrana zava-manana aina (akoho, ondry, zavamaniry, sns) na tsy manana aina (tapakazo, ahitra, rano, tany, vato, vakana, sns);
- na amin' ny alalan' ny tsy fanaovana na tsy fitondrana na tsy fametrahana ao an-trano na ao an-tanàna zavatra voatondro manokana, arakaraka ny fototry ny zava-dratsy mahazo ny tena.
Ny olona afaka manala faditra hanova
Ny ombiasa sy ny mpanandro no afaka mamaritra mazava ny zavatra ho entina na hatao na tsy hatao mba hanalana ny faditra. Ny olona antsoina hanatanteraka ny fanalana faditra no atao hoe "mpamaditra".
Fanalana faditra tsy ilana mpamaditra hanova
Raha maivamaivana ny zava-dratsy mahazo ny tena dia tsy voatery itadiavana olona hafa hanatanteraka ny ala faditra fa ny tena ihany dia afaka manatanteraka izany. Misy ny atao hoe "mifaditra ahitra", izay tsy inona fa fakana ravin-kazo na tapaka ahitra na bozaka izay atoraka mandingana ny soroka; tandremana anefa ilay zavatra atoraka mba tsy hilatsaka eo amin' ny aloky ny mpamaditra. Ampiasaina koa ny tapatapaka hodi-kazo na vakivakin-kazo maivana atao hoe "faditr' ovana" na "taha". Rehefa vita ireo teny tononina amin’ ny razana dia atoraka izany tapa-kodi-kazo na vakivakin-kazo izany ka afaka amin' izay ny faditra.
Ala faditra tanterahin' ny mpamaditra hanova
Raha tsy mahomby ny ala faditra tsotsotra, na raha lehibe ihany ny zava-dratsy tokony hanaovana faditra, indrindra fa raha ny sain' ilay olona alam-paditra no voa, dia antsoina amin' izany ny "mpamaditra". Raha mosavy no nahazo ny tena dia ombiasa mahay kokoa noho izay nanao ny mosavy no tokony manala faditra. Ny mpamaditra dia manao ny ala faditra izay androahana ny fanahy ratsy sy iantsoana ny razana, izay atao ankarihary atrehin' olona maro. Mihorakoraka sy miantsa ny mpanatrika.