Fiteny ilôkanô

Ny fiteny ilôkanô dia fiteny ao amin' ny vondrona malaiô-pôlineziana andrefana ao amin' ny fianakaviam-piteny aostrôneziana, ampiasain' ny vahoaka ilôkanô indrindraindrindra sy, amin' ny maha lingua franca azy, ny vahoaka igôrôta ary koa ny teratany monina ao amin' ny Lohasahan' i Cagayan. Mampiasa izany any Filipina ny mpiteny miisa 7,7 tapitrisa eo ho eo izay 11,5 % amin' ny fitambaran' ny mponina ao amin' ilay firenena, indrindra any amin' ny tapany avaratra amin' i Luzon. Azon' ny Filipinô efa ho 10 tapitrisa io fiteny io izay laharana fahatelo ao amin' ilay firenena. Mety hantsoina hoe fiteny ilokô koa io fiteny io. Amin' ny fiteny ilôkanô izy dia atao hoe ti pagsasao nga Ilokano na ti pagsasao nga Iloco.

Faritra any Filipina itenenana ilôkanô

Amin' ny maha fiteny aostrôneziana azy dia misy ifandraisany amin' ny fiteny maley (indôneziana sy maleziana), ny fiteny tetoma, ny fiteny samôrô, ny fiteny fijiana, ny fiteny maôry, ny fiteny haoaiana, ny fiteny samôana, ny fiteny tahitiana, ny fiteny paioana, ary ny fiteny malagasy. Mifandray akaiky amin' ny sasany amin' ny fiteny aostroneziana hafa any Luzon Avaratra izy io, ary somary mifankahazo amin' ny fiteny balangaô sy ny fitenim-paritra atsinanana amin' ny fiteny bôntôka.

Ny fiteny ilôkanô dia nanana ny rafi-panoratana teratany sy tarehin-tsoratra fantatra amin' ny anarana hoe kur-itan. Nisy ny soso-kevitra hamelomana indray ny soratra kur-itan amin' ny alalan' ny fampianarana izany any amin' ny sekolim-panjakana sy tsy miankina ahitana maro anisa ilôkanô ao Ilocos Norte sy ao Ilocos Sur.