Nekô II
I Nekô II na Nekao II dia mpanjaka tao amin' ny tarana-mpanjaka faha-26 (610–595 tal. i J.K.), izay nanjaka tao Sais, tany Ejipta. Nanao asa fanorenana maromaro nanerana ny fanjakany i Nekô. Tamin' ny fotoana nanjakany, araka ny voalazan' i Herôdôtôsy, mpahay tantara grika, dia nandefa iraka Fenisianina i Nekô II, izay nandeha sambo avy any amin' ny Ranomasina Mena nanodidina an' i Afrika, tao anatin' ny telo taona, ka nankany amin' ny Andilan-dranomasin' i Gibraltar ary niverina tany Ejipta. Ny zanany lahy, Psamtika II, dia nety ho nanaisotra ny anaran' i Nekô tamin' ny tsangambato sy ny zavatra naorina rehetra, rehefa niandimby azy.
Amin' ny teny grika izy dia atao hoe Νεκώς Β' / Nekôs II fa amin' ny teny hebreo dia נְכוֹ / Neḵō.
Nanana anjara toerana lehibe teo amin' ny tantaran' ny Empira Asiriana Vaovao sy ny Empira Babilôniana Vaovao ary ny Fanjakan' i Jodà i Nekô. I Nekao II dia azo inoana fa ilay farao Nekô izay voatonona ao amin' ny Boky faharoan' ny Mpanjaka sy ny Boky faharoan' ny Tantara ary Bokin' i Jeremia ao amin' ny Baiboly. Ny fandresena tany Azia no zava-kendren' ny diabe fanafihana nataon' i Nekô faharoa, mba hanakanana ny fandrosoan' ny Empira Babilônianina Vaovao miankandrefana, ary hanapaka ny lalan' ny varotra namakivaky an' i Eofrata. Resy anefa ny Ejipsiana noho ny fanafihana tsy nampoizina nataon' ny Babilôniana, ka noroahina avy tany Siria tamin' ny farany izy ireo.