Ny fiteny hindỳ (amin' ny fiteny hindỳ: हिन्दी / hindī) dia tenim-pirenen' i India. Ny isan' ny olona mampiasa ny fiteny hindỳ dia misy 480 tapitrisa eo ho eo, 360 tapitrisa amin' ireo no manao ny fiteny hindỳ ho fitenin-dreny. Amin' ny lafiny ôfisialy dia nampiasaina ho lingua franca any India ny fiteny hindỳ, kanefa 40 isan-jaton' ny olona fotsiny no mampiasa io fiteny io any India. Any avaratr' i India no misy ny ankabeazan' ny mpiteny hindỳ. Fiteny voasokajy ao amin' ny ratsana arianin' ny fiteny indô-eorôpeanina io fiteny io, nipoitra avy amin' ny fiteny sanskrity sy prakrity, soratana amin' ny alalan' ny abogida devanagari.
Mitovy be amin' ny fiteny hindỳ ny fiteny ordò fa soratana amin' ny abidy arabo, amin' ny fiova persana. Be teny avy amin' ny fiteny persana sy avy amin' ny fiteny arabo ny fiteny ordò. Mifanakaiky be ny ava-peon' ireo fiteny ireo ary, talohan' ny fisarahan' i India sy i Pakistàna tamin' ny 1947, fiteny iray ihany ireo, ary Hindustani no anaran' ilay fiteny.
