Fiteny hererô
Ny fiteny hererô dia fiteny banto ampiasain' ny vahoaka hererô izay, amin' ny ankapobeny, hita any Namibia, nefa koa ampiasain' ny vondrona any Bôtsoana sy any amin' ny faritra mitoka-monina any Angôla. Mitotaly 150 000 ny mpiteny hererô ao. Atao hoe otjiherero na ochiherero io fiteny io amin' ny fiteny hererô.
Ao Namibia dia mahafaoka ny faritra antsoina hoe Hereroland ny toera,a itenana hererô; izany dia ahitana ny ampahany be amin' ny tapany atsinanana amin' ny faritra Omaheke, ary koa ny faritra Otjozondjupa sy Kunene. Miteny ôtjihimba, fitenim-paritry ny fiteny hererô, ny Himba, izay vahoaka mpihavana amin' ny Hererô. Ao Windhoek renivohitr' i Namibia dia ahitana mpiteny hererô vitsy nefa tsy azo tsinontsinoavina.
Tamin’ ny faran’ ny taonjato faha-19, noho ny fandikana ny Baiboly ho amin’ ny teny hererô nataon’ ny misiônera prôtestanta Gottlieb Viehe (alemana, 1839 - 1901), ny fiteny tenenina dia nosoratana amin’ ny abidy latina nasiam-panovana. Ny mômpera Peter Heinrich Brincker (1836 - 1904), izay nahay io fiteny io, dia nandika asa soratra teôlôjika sy hira maro.
Ny fiteny hererô dia ampianarina any amin' ny sekoly ambaratonga fototra amin' ny maha tenin-dreny sy fiteny faharoa azy, ary taranja fototra ao amin' ny Oniversiten' i Namibia. Ny fiteny herero dia iray amin' ny fitenin' ny vitsy anisa enina ampiasaina amin' ny radiom-panjakana namibianina. I Embo Romambo dia namoaka ny rakibolana hererô izay hany tokana hatramin' izao.