Diogo Dias (tantsambo)

I Diogo Dias, fantatra koa amin' ny anarana hoe Diogo Gomes, dia Pôrtogey mpikaroka tany vaovao sy tantsambo niaina amin' ny taonjato faha-15. Rahalahin' i Bartolomeu Dias izy ary nahita ny sasany amin' ny vondro-nosy Cabo Verde (Kapvera) niaraka amin' i António Noli. Mety teraka talohan' ny taona 1450 izy ary maty taorian' ny taona 1500.

Fiainany

I Diogo Dias dia voalaza tamin' ny Aogositra 1487 ho kapitenin' ny sambo famatsiana niaraka tamin' ny rahalahiny Bartolomeu Dias izay nandeha sambo nankany Cape of Good Hope. I João de Santiago no mpanamory an' io sambo io, izay niaraka tamin' i Diogo Cão tamin' ny diany nankany amin' ny ony Congo.

I Diogo Dias dia nandray anjara tamin' ny fahitana ny lalana an-dranomasina avy any Pôrtogaly mankany India amin' ny maha mpirakitra tantara sy mpanoratra teny amin' ny sambon' i Vasco da Gama. Tompon' andraikitra tamin' ny tobim-barotra pôrtogey maro vao naorina tao Calcutta, dia nogadrain' ny manam-pahefana teo an-toerana izy nefa afaka nandositra. Avy eo izy dia nandray anjara tamin' ny diabe notarihin' i Pedro Álvares Cabral tany India ary anisan' ny tao amin' ny ekipa tonga tany Brezila tamin' ny Avrily 1500. Ny taratasy ho an' ny mpanjaka Manuel momba ny fahitana an' i Brezila dia namariparitra azy ho "lehilahy tsara fanahy sy mahafatifaty", ary niandraikitra almoxarife ao Sacavém. Izany taratasy izany kosa dia milazalaza ny fomba nitondrany mpitsoka kôrnemiozan' ny ekipany ho any amin' ny morontsiraka nisy ny tompon-tany, tamin' ny Alahady 26 Avrily 1500, ary niara-nandihy tamin' izy ireo sady nihazona ny tanan' izy iireo, ka nahatalanjona azy ireo sy nahafalifaly azy ireo.

Noho ny tafio-drivotra mahery, ny sambony dia tafasaraka tamin' ny sambon' i Pedro Alvarez Cabral tamin' ny volana Mey 1500 tao amin' ny Cape of Good Hope. Nijery ny zava-misy teny amin' ny Ranomasimbe Indianina teo amin’ ny fidirana mankao amin’ ny Ranomasina Mena ny sambony avy eo.

Taty aoriana dia mety ho izy no Eorôpeana voalohany nahitany nosy La Réunion sy i Maorisy, izay samy ao atsinanan’ i Madagasikara, manodidina ny Jolay 1500. Tamin' ny 10 Aogositra 1500, izy no Eorôpeana voalohany nahita an' i Madagasikara, izay nantsoiny hoe Nosy São Lourenço. Niverina tany Pôrtogaly izy taorian’ izay, ary nandalo an' i Môzambika, any amin' ny morontsiraka atsinanan' i Afrika. Tany amin' ny morontsirak' i Cabo Verde, dia sendra ny sambo efatra tamin' ny diabe notarihin' i Pedro Álvares Cabral ho any India teo aloha, izay teny an-dalana hiverina toa azy. Tsy fantatra ny daty marina sy ny toerana nahafatesany.