Astarte

I Astarte dia andriamanibavy tao amin' ny tontolo helenistika, izay tsy iza fa ilay andriamanibavy tany Atsinanana Akaiky tamin' ny Andro Taloha atao hoe ʿAṯtart. I ʿAṯtart dia andriamanitra semitika avaratra-andrefana mitovy amin' ny andriamanibavy semitika atsinanana atao hoe Istara (Ishtar). Amin' ny teny grika izy dia atao hoe Ἀστάρτη / Astartē.

Sarivongan' ny andriamanibavy Astarte

I Astarte dia nivavahana tamin' ny Andron' ny Alimo hatramin' ny Andro Taloha Klasika, ary ny anarany dia mifandray manokana amin' ny fivavahana aminy tao Ampiposahana taloha teo amin' ny Kananita sy Fenisiana, na dia nifandray tamin' ny tanàna amôrita toa an' i Ogarita (Ugarit) sy Emara (Emar) aza izy tamin' ny voalohany, ary koa i Mari sy Ebla. Notompoina tany Ejipta koa izy, indrindra fa tamin' ny andron' ny Ramesida, taorian' ny fampidirana ny sekta vahiny maro tany. Nampiditra ny fivavahany tany amin' ny zanataniny tany amin' ny Saikanosy Iberika ny Fenisianina.