Antrôpôlôjia

Ny antrôpôlôjia dia siansa eo am-pihaonan' ny siansan' ny mahaolona sy ny siansan' ny zavaboary, izay andalinana ny olombelona sy ny vondron' olombelona amin' ny endriny rehetra, na ara-batana izany (araka anatômia, ara-biôlôjia, araka môrfôlôjia, araka-piziôlôjia, araka ny fivoarany, sns), na ara-kolontsaina (ara-piarahamonina, ara-pivavahana, ara-psikôlôjia, ara-jeôgrafia, sns). Avy amin' ny tapa-teny grika roa ny teny hoe antrôpôlôjia, dia ny hoe ἄνθρωπος / anthrôpos, izay midika hoe "olombelona", sy ny hoe λόγος / logos, izay midika hoe "teny", "lahateny", "fandalinana", "siansa". Anisan' ny zana-taranjan' ny antrôpôlôjia ny antrôpôlôjian' ny fiarahamonina (na antrôpôlôjia sôsialy), ny antrôpôlôjian' ny fiarahamonina sy ny kolontsaina (na antrôpôlôjia sôsiô-koltoraly), ny antrôpôlôjian' ny fiteny, ny antrôpôlôjia biôlôjika, ny antrôpôlôjia fizika ary ny antrôpôlôjia arkeôlôjika.