Takodaran' i Madagasikara

Ny takodaran' i Madagasikara na tsakodaran' i Madagasikara na takidaran' i Madagasikara dia karazana vorona misy sangany, anisan' ny fianakaviana Upupidae. Ny hoe Upupa marginata no anarany ara-tsiansa. Ny Malagasy dia miatso azy hoe takodara, tsakodara, takidara, barao, drao na takadalana fotsiny ihany koa.

Takodara Upupa marginata

Taloha izy dia noheverina ho zana-karazan' ny Upupa epops (Upupa epops marginata), saingy natokana no karazana hafa noho ny feony sy ny fahasamihafan' ny volony. Ny manam-pahaizana sasany dia mbola mihevitra ny karazana telo ho mitovy. Misy manam-pahaizana ihany koa mamondrona ho karazana iray ny takodara afrikana sy ny takodarambazaha (eoraziana), nefa nanasaraka ny takodaran' i Madagasikara.

Ity vorona ity dia tsy hita afa-tsy eto Madagasikara izay toeram-ponenany voajanahary, ao amin' ny ala maina. Vorona mbola betsaaka izy io ary heverin' ny Vondrona Iraisam-Pirenena ho an' ny Fiarovana ny Zavaboary ho tsy dia mampanahy loatra ny fiarovana azy.

Fitsinjaràn' ny faritra misy ny takodara: Maitso antitra: faritra onenan' ny takodarambazaha maharitra, volomboasary: faritra fanamboarany ny tranony, manga: faritra andaniany ny ririnina. Maitso: faritra misy ny takodara afrikana. Maitso matroka: faritra misy ny takodaran' i Madagasikara

Ny takodarambazaha dia mipetraka any amin' ny faritra manana tioetany antonony sy mafana ao Afrika sy any Azia ary ao Eorôpa.

Jereo koa

• Takodara
• Takodara afrikana
• Takodarambazaha
• Takodarabe