Tafsir

Ny tafsir dia famakafakana ny Kor'any. Amin' ny teny arabo izany dia atao hoe تَفْسِير / tafsīr, (izay midika hoe "fanazavana").

Ny tafsir atao amin' ny Kor'any, izay mifototra amin' ny hadita (hadith), dia tsy maneho afa-tsy ny hevi-teny miharihary (zahir) ao amin' ny lahatsoratra masina, fa tsy mifandray amin' ny famakafakana miafina na esôterika (batin). Ny mpanoratra ny tafsir dia atao hoe مفسر / mufassir (raha tokana) na مفسرون / mufassirūn (raha maro). Ny asa famakafakana dia mihoatra noho ny fanakarana ny hevitra tsotran' ny andininy. Mitaky fahalalana lehibe momba ny lovantsofina am-bava (hadith) sy fahafehezana ny fiteny arabo mbamin' ny pitsopitsony madinika amin' io fiteny io izany.

Ny siansan' ny tafsir dia tena zava-dehibe tamin' ny vanimpotoana voalohan' ny finoana silamo, tamin' ny fotoana izay mbola tsy nametrahana mari-janapeo ny lahatsoratra masina ka mety ho tsy nazava. Na izany aza, na dia ilaina ny tafsir dia tokony ho raisina amim-pitandremana, araka ny filazan' ny sekoly mozilmana sasany (anisan' izany i Ahmad Ibn Hanbal izay mamaritra azy io ho tsy mitombina), satria be dia be ny fihoaram-pefy sy ny fitantarana tsy tena izy.

Famakafakana maherin' ny 300 amin' ny Kor'any no misy, satria ny andininy dia afaka "miteraka vakiteny isan-karazany arakaraka ny lafim-pahaizan' ny mpamakafaka (misy ny havanana kokoa amin' ny fahaizana ny fiteny, amin' ny teôlôjia, amin' ny lalàna, ao ny mpandala ny nentin-drazana ary ao koa ny môdernista), ny toetrany (malalaka, hentitra, sns.), ny firehana ara-pivavahana (sonita na siita, dôgmatika na mistika), ny safidiny momba ny fomba fiasa na metôdôlôjia (manome tombony ny vakitenin' ny soratra masina na ny hevi-daliny), sns.

Noho izany dia nofinofy ny hisian' ny marimaritra iraisana, ary tsy mety feno tanteraka, na dia eo amin' ny zavatra antenain' ny olona hahitana fifanakaukezan-kevitra bebe kokoa eo amin' ny samy mpanao heviteny.