Ny Sikara na Sikary na Sikera dia ireo olona ao amin' ny antoko jiosy mpanidrahindra tanindrazana amin' ny fomba fara tampony izay niezaka ny handroaka ny Rômana sy Jiosy mpomba azy ireo hiala an' i Jodea (na Jodia).

Ny teny hoe sikara (latina: Sicarii) dia avy amin' ny teny latina hoe sica, antsy fohy marani-droa mifaingoka afenina ao anaty akanjo, izay fitaovam-piadiana tian' ny Jiosy mpamono ireo Jiosy hafa miara-miasa amin' ny Rômana, na mamono ireo Jiosy niova finoana ka tsy mety forana. Ny hoe Sikara izany dia midika ara-bakiteny hoe "olona mitondra sica". Amin' ny teny grika dia atao hoe Sikaroi ny Sikara. Amin' ny teny hebreo vaovao kosa dia atao hoe סיקריים / Siqari'im izy ireo. Teny fanaratsiana mety avy amin' ny tenin' ny Rômana ny teny hoe Sicarii izay nampiasan' i Flavio Jôsefa tamin' ireo taona 50 hanondroany vondrona jiosy izay tsy fantatra na naman' ny Zelôta na tsia. Talohan' ny Fikomiana Lehibe nataon' ny Jiosy tamin' ny taona 66 dia niavaka izy ireo noho ny fanaony izay namono ireo Jiosy miara-miasa amin' ny Rômana, ka heverina fa endrika taloha nisehoan' ny asa fampihorohoroana ara-pôlitika izany.

Araka ny nosoratan' i Flavio Jôsefa dia nikambana tamin' ny fianakavian' i Jodasy Galileana mpanorina ny "Filôzôfia Fahefatra" ny lohandohany teo amin' ny Sikara, ka misy amin' ny mpandinika ny miresaka ny amin' ny dinastian' ny mpikomy. Tamin' ny Fikomiana Lehibe tamin' ny taona 66 dia nandray anjara betsaka izy ireo. Taorian' ny namonoan' olona an' i Menahema zanaka na zafin' i Jodasy Galileana anefa dia toa tsy nanao afa-tsy ny nifehy ny toeram-pamaharana atao hoe Masada sy amin' ny fanafihana eny amin' ny manodidina azy izy ireo. Tamin' ny taona 90 tamin' ny fanapahan' i Dômitiano dia lazain' i Flavio Jôsefa fa nitarika ny famaharana tao amin' i Masada i Eleazara zanak' i Jairo (zafin' i Jodasy Galileana). Izany no fisehoan' ny faran' ny fikomian' ny Jiosy izay nisafidianan' ny Sikara rehetra ny famonoan-tena toy izay ny hosamborin' ny Rômana, dia nifarana teo ny fihetsiketsehan' izy ireo tamin' ny taona 74.

Jereo koa hanova