Nebokadnetsara I
I Nebokadnetsara I na Nebokadnezara III na Nabokôdônôzôra III dia mpanjakan' i Babilôna nanomboka tamin' ny taona 1125 ka hatramin' ny 1104 tal. J.K. Tsy tokony hafangaro amin' ilay Nebokadnetsara II izay resahin' ny Baiboly hebreo sady fantatra kokoa izy.
Izy no heverina ho mpanjaka lehibe indrindra tamin' ny tarana-mpanjaka Pashe ("Dinastia faharoan' i Isin"), mpitondra nifandimby teo amin' ny seza fiandrianan' i Babilôna nanomboka tamin' ny 1154 tal. J.K. Mpanjaka mpiady i Nebokadnezara. Nanao diabe fanafihana mifanesy tany Zagros sy tany Asiria afovoany izy, ary nanao fahirano ny renivohitra mihitsy aza. Ny fahombiazany lehibe indrindra dia ny naharesy ny Elamita tamin' ny taona 1129, izay nanafika an' i Babilôna teo antenatenan' ny taonjato faha-12 talohan' ny nandroahan' ny mpanjaka nodimbiasan' i Nebokadnetsara azy. Nanapa-kevitra ny hanafika an' i Hutelutush-Inshushinak mpanjakan' izy ireo tao amin' ny fari-taniny i Nebokadnezara. Voatosika izy tamin' ny voalohany nefa nahomby tamin' ny ady fanindroany, noho ny fialan' ny mpitarika elamita iray atao hoe Shitti-Marduk tsy hiady intsony, izay nampindrana azy ny miaramilany ary nanery ny fahavalony hiala tany amin' ny tanin' i Anshan. Izany fandresena izany dia voalaza ao amin' ny sora-tsokitra amin' ny kudurru. Io fandresena io dia nahatonga ny mpandresy halaza amin' ny maha mahery fo azy.
Nanitatra sy nanamafy ny sisin-tany i Nebokadnetsara avy eo, ka niady tamin' ny Asirianina i Babilôna.
Ny anarany hanova
Amin' ny fiteny babilôniana dia Nabûkudurrîutsur no fiantsoana an' i Nebokadnetsara. Avy amin' ny fehezanteny akadiana hoe Nabou-kudurri-usur ny anaran' i Nebokadnetsara. Io dia midika hoe "Ry Nabu, arovy ny lahimatoako!". I Nabu dia andriamanitry ny fahendrena babilôniana sady zanaky ny andriamanitra Mardoka (Marduk).