Magiara (vahoaka)
Ny Magiara na Majiara na Hôngroà na Hongariana dia vahoaka teratany ao Hôngria (hôngariana: Magyarország) sy any amin' ny tany hôngroà ara-tantara (izany hoe an' ny Fanjakan' i Hôngria taloha) izay manana kolontsaina, tantara, razambe ary fiteny iraisana. Izy ireo dia vondrona ara-poko sy ara-piteny finô-ogriana avy any Azia Afovoany ary ny fifindra-monina nifanesy, voalohany nankany amin' ny Tendrombohitra Ural, avy eo nankany amin' ny Ranomasina Mainty (Tanin' i Etelköz, i Okraina ary Môldavia ankehitriny), izay nitarika ny famoronana an' i Magyarország ("Firenena Magiara"), izany hoe i Hôngria. Ny adihevitra ara-tantara miverimberina dia iresahana ny fisian' ny Magiara Tatsinanana (keleti Magyarok) any Kaokazy sy any Azia Afovoany. Amin' ny teny hongariana dia atao hoe Magyar [ˈmɒɟɒɾ] (raha tokana) na Magyarok [ˈmɒɟɒɾok] (raha maro).
Amin' izao fotoana izao, ny hoe "magiara" dia matetika ampiasaina ho anaram-poko amin' ny heviny ara-tantara (talohan' ny namoronana ny fanjakana hôngroà) na amin' ny heviny ara-tsôsialy sy ara-kolontsaina, mba hanondroana ny Magiara any ivelany, izany hoe. ireo vahoaka vitsy anisa miteny hongroà any amin' ny firenena manamorona an' i Hôngria. Amin' ny teny hôngroà, ny hoe magyar dia ampiasaina amin' ny heviny ara-pôlitika ihany koa, mba hanondroana ny zava-drehetra mifandraika amin' i Hôngria amin' ny maha firenena môderina azy ary, raha itarina, anondroana ny olom-pirenena hôngroà rehetra, na inona na inona fiaviany ara-tsôsialy sy ara-kolontsaina.
Miisa 14 500 000 any ho any ny Magiara ankehitriny izay monina ao Hôngria (miisa 9 397 432) sy amina firenena maromaro, indrindra i Etazonia (1 530 000), i Romania (1 227 623), i Slôvakia (520 528), i Kanada (315 510), i Serbia (200 000), i Okraina (170 000), i Krôasia (16 000), i Tsekia (15 000), i Slôvenia (10 000).