Israelianina
Ny Israeliana na Israelianina dia ny olom-pirenen' i Israely amin' izao fotoana izao. Mety ho Jiosy ara-pirazanana na ara-pinoana izy ireo, mety ho Arabo, mety ho Mozilmana na Kristiana, ary mety ho avy amina vahoaka hafa koa. Mety ao Israely na any amin' ny firenena hafa ny fonenan' ny Israeliana.
Amin' ny teny hebreo izy ireo dia atao hoe יִשְׂרְאֵלִים / Yīśreʾēlīm; , fa amin' ny teny arabo kosa dia إسرائيليين / Isrāʾīliyyīn.
Ny mponina ao amin' ilay firenena dia Jiosy sy Arabo, izay 75 % sy 20 % amin' ny olom-pirenena; arahin' ireo vahoaka hafa vitsy anisa ara-poko sy ara-pivavahana, izay mahatratra 5 %.
Ny kolontsaina israeliana tany am-boalohany dia nofaritan' ireo vondrom-piarahamonina jiosy am-pielezana izay nanao aliyah ho any Palestina notantanin' ny Britanika avy any Eorôpa sy Azia Andrefana ary Afrika Avaratra tamin' ny faramparan' ny taonjato faha-19 sy ny fiandohan' ny taonjato faha-20. Taty aoriana ny fifindra-monina jiosy avy any Etiôpia, ny fanjakan' ny Firaisana Sôvietika teo aloha, sy i Amerika dia nampiditra singa ara-kolontsaina vaovao tao amin' ny fiarahamonina israeliana ary nisy fiantraikany lalina teo amin' ny kolontsaina israeliana môderina izany.
Nanomboka tamin' ny fahaleovantenan' i Israely tamin' ny taona 1948 dia manana zanaka am-pielezana be dia be ny Israeliana sy ny taranaky ny Israeliana, izay mifanipaka amin' ny ankamaroan' ny Jiosy am-pielezana sy amin' ny an' ny vondrona ara-poko sy ara-pivavahana hafa; tombanana fa efa ho ny 10 % amin' ny mponina israeliana amin' ny ankapobeny no mipetraka any ivelany, indrindra fa any Rosia (ka i Môskoa no ahitana vondrom-piarahamonina israeliana lehibe indrindra ivelan' i Israely), any India, any Kanada, any amin' ny Fanjakana Mitambatra, any Etazonia, ary manerana an' i Eorôpa.