Fiteny ôska

Ny fiteny ôska na fiteny ôskana dia fiteny efa tsy misy mpiteny intsony, ao amin' ny vondrom-piteny sabelika ao amin' ny fiteny italika izay ao amin' ny fianakaviam-piteny indô-eorôpeana. Fiteny iray fipoirana amin' ny fiteny latina (izay ao amin' ny sampana latinô-faliska ao amin' ny fiteny italika) ity fiteny ity, izay samy misy rafitra ara-pitsipiteny iraisana.

Ny fiteny ôska dia tsy isalasalana fa ny teny italika fantatra indrindra aorian' ny fiteny latina noho ny fielezany manerana ny faritra maro ao amin' ny Saikanosy Italiana. Raha ampitahaina amin' ny fiteny italika hafa dia lahatsoratra maro amin' ny teny ôska no ananana ankehitriny, anisan' izany ny Cippus Abellanus malaza, ny Tabula Bantina ary ny Tabula Osca.

Ny faritra niorenan' ny fiteny ôska dia mifanitsy amin' ny faritra afovoan' ny tapany antenatenany sy tapany atsimon' i Italia ankoatry ny faritra misy an' i Puglia (frantsay: Pouilles) sy Calabria ankehitriny. Nampiasa an' io fiteny io ny fokom-pirenena maro, anisan’ izany ny Samnita, ny Aosôna ary ny Sidikiny. Ireo fokom-pirenena roa farany ireo dia matetika mivondrona amin' ny anarana hoe "Osci".

Heverina fa ny abidy ôska dia nampiasaina hatramin' ny taonjato faha-7 tal. J.K. ka hatramin’ ny taonjato voalohany taor. J.K.

Ny teny hoe "ôska" na "ôskana" dia ampiasaina hanondroana ny vondrom-piteny ao amin' ny fianakaviam-piteny sabelika misy ny fiteny ôska sy karazan' io telo (fiteny hernikana sy fiteny marokiniana ary ny fiteny peligniana), izay fantatra amin' ny soratsokitra navelan' ny Hernikiana sy ny Marokina ary ny Peligniana, fokom-pirenena madinika tao amin' ny tapany afovoan' i Italia.