Ady Enina Andro
Ny Ady Enina Andro dia ady nitranga nanomboka tamin' ny Alatsinainy 5 Jona sy nifarana tamin' ny Asabotsy 10 Jona 1967 ary nampifanandrina an' i Israely amin' i Ejipta sy i Jôrdania ary i Siria. Anisan' ny nandray anjara koa i Libanona, i Iràka, i Arabia Saodita, i Kôeity ary i Pakistàna.
Ity ady ity dia natombok' i Israely ho setrin' ny hetsiky ny miaramila ejipsiana sy taorian' ny fanakanana ny Andilan-dranomasin' i Tiran nataon' i Ejipta tamin' ny 23 May 1967 mba tsy handehanan' ny sambo israeliana (nambaran' ny Israeliana mialoha fa heveriny ho fihetsika manosika amn' ny fanambarana ady no nataon' i Ejipta). Ny harivan’ ny andro voalohan’ ny ady dia rava ny antsasaky ny tafika ana habakabaka arabo; tamin’ ny harivan’ ny andro fahenina, dia resy ny tafika ejipsiana sy siriana ary jôrdaniana.
Nandresy ny fahavalony tamin' ny vava ady rehetra ny fiara mifono vin' ny tafika israeliana. Tao anatin' ny herinandro latsaka dia nampitombo avo telo heny ny tany feheziny ny fanjakana hebreo: lasany avy amin' i Ejipta ny Salavantanin' i Gaza sy ny Saikanosin' i Sinay, nesoriny tsy ho an' i Siria ny Havoanan' i Golan ary nalainy avy amin' i Jôrdania i Jôrdania Andrefana sy i Jerosalema Atsinanana. Mbola ara-tandindona kokoa noho ny faharesen' ny Arabo ny fahazoana an' i Jerosalema izay tanàna tranainy.
Ny fandresena miezinezina azon' i Israely dia nametraka azy ho anisan' ny firenena matanjaka ara-tafika tsy azo resena any Atsinanana Afovoany ary nahazoany laza lehibe maneran-tany.
Mbola misy fiantraikany amin' ny jeôpôlitikan' ilay faritra amin' izao fotoana izao ny vokatr' ity ady ity, izay fizaràna iray teo amin' ny Ady Israeliana-Arabo. Niala tamin' ny faritany roa voabodo i Israely, dia i Sinay sy ny Salavantanin' i Gaza, nefa nisy roa hafa nampidirina ho anisan' ny tanin' i Israely, dia i Jerosalema Atsinanana sy ny Havoanan' i Golan, — hetsika roa tsy neken' ny fianakaviambe iraisam-pirenena — ary ny ampahany be amin' i Jôrdania Andrefana dia mbola voabodo.