Tudor Parfitt
I Tudor Parfitt dia mpahay tantara, mpanoratra, mpampita vaovao, mpanao dia lavitra ary mpitsangatsangana avy ao Britaina Lehibe. Manam-pahaizana manokana amin' ny fandalinana ny vondrom-piarahamonina jiosy eran' izao tontolo izao, indrindra aty Afrika sy any Azia ary any Amerika izy. Ny sasany amin' ireo vondrom-piarahamonina ireo dia tsy fantatra ho nanana fiaviana jiosy raha tsy tamin' ny faramparan' ny taonjato faha-20. Teraka tamin' ny 10 Ôktôbra 1944 tao Wales izy.
Mpampianatra amin' ny fandalinana momba ny Jiosy, ao amin' ny Oniversiten' i Lôndra ao amin' ny School of Oriental and African Studies (SOAS), izay maha tale mpanorina ny Centre for Jewish Studies azy i Parfitt. Mpiara-miasa zokiolona ao amin' ny Oxford Center for Hebrew and Jewish Studies izy izao.
Mpiara-miombon' antoka zokiolona ao amin' ny Royal Academy of Overseas Sciences (na Koninklijke Academie voor Overzeese Wetenschappen) any Belzika sady ao amin' ny filankevi-pitantanana amin' ny maha-filohan' ny komity mpanolotsaina akademika ny Projet Aladin izay miorina ao Paris ary ao amin' ny Committee of Experts of the New York izay miorina ao amin' ny Global Hope Coalition. Mpikambana ao amin' ny Royal Historical Society any amin' ny Fanjakana Mitambatra izy.
Voatendry ho profesora miavaka tao amin' ny Florida International University izy tamin' ny taona 2012 ary mpampianatra malaza amin' ny oniversite tamin' ny taona 2018. Mpiara-miombon' antoka ao amin' ny Hutchins Center for African and African American Research, ao amin' ny Harvard College izy. Tamin' ny taona 2011 dia nanome ny lahateny Nathan Huggins tao amin' ny Harvard College izy, izay navoakan' ny Harvard University Press.