Tokonam-pahantrana
Ny tokonam-pahantrana na fetram-pahantrana dia tondro mifandray amin' ny fahantrana. Misy ny tokonam-pahantrana tanteraka (mifototra amin' ny sobikam-panjifana faran' izay kely indrindra, misy na tsy misy fanondro ara-bola) ary ao koa ny tokonam-pahantrana ampitahaina (isanjato mitaha amin' ny salam-pidiram-bola). Ity tokonana ity dia mitaky sanda tena samihafa arakaraka ny safidy momba ny fikajiana ho an' ny firenena iray. Mifanaraka amin' ny isanjaton' ny mponina antsoina hoe taham-pahantrana izany. Taha marin-toerana an' ny firenena tsirairay ny tokonam-pahantrana ampitahaina, izay mahakasika ny 15 % amin' ny mponina; izany akory tsy midika fa ny 15 % amin' ny mponina dia mahantra. Amin' ny lafiny iray dia fanombanana tsara ho an' ny fahantrana ny taha mifanandrify amin' ny tondro tanteraka. Raisina ny zava-misy mahakasika ny olona tsirairay mba hampifanaraka ny tokonam-pahantrana amin' ny fahasamihafan' ny toe-javatra iainana, ohatra, ny vesatry ny fianakaviana, ny taona, na ny isan' ny olona ao an-tokantrano.
Ny fetram-pahantrana dia haben' ny fidiram-bola kely indrindra heverina ho sahaza amin' ny firenena iray. Matetika ny taham-pahantrana no kajina amin' ny alalan' ny fanombanana ny totalin' ny sandan' ny zavatra ilaina mandritra ny herintaona ho an' ny olondehibe salany. Mazàna no mahaforona ny ampahany lehibe indrindra amin' ity tombana ity ny vidim-ponenana, toy ny hofan-trano, noho izany dia manara-maso ny tsenan' ny trano fonenana sy ny tondro hafa momba ny vidim-ponenana amin' ny maha fiantraikany lehibe amin' ny tokonam-pahantrana ny mpahay toekarena. Matetika no ampiasaina ny momba ny olona tsirairay hijerena toe-javatra samihafa, anisan' izany ny maha ray aman-dreny, zokiolona, zanaka, manambady, sns. Azo ahitsy isan-taona ny fetran' ny fahantrana. Amin' ny fampiharana, toy ny famaritana ny fahantrana, dia ambony lavitra ny famaritana ôfisialy na iombonana momba ny taham-pahantrana any amin' ny firenena mandroso noho ny any amin' ny firenena andalam-pandrosoana.