Feo (fizika)
Ny feo dia fipararetra mekanika anaty etona na ranoka na vainga miely amin' ny endrika onja, atao hoe onjam-peo, noho ny fievotry ny toerana (mietona na miranoka na mivainga) izay henon' ny sofina indrindra amin' ny maha taovam-pandrenesana azy. Mahatsapa izany hovitrovitra izany amin' ny alalan' ny fandrenesana ny olombelona, toy ny biby maro.
![](http://upload.wikimedia.org/wikipedia/commons/thumb/e/e0/Close-up_photograph_of_a_calf%27s_head_looking_at_the_viewer_with_pricked_ears_in_Don_Det_Laos.jpg/284px-Close-up_photograph_of_a_calf%27s_head_looking_at_the_viewer_with_pricked_ears_in_Don_Det_Laos.jpg)
Ny akostika no siansa mandalina ny feo; ny psikôakostika no mandinika ny fomba ahafahan' ny taovam-pihainoana ao amin' ny olombelona hahatsapa sy hanome heviny ny feo. Ao amin' ny fiziôlôjia sy ny psiôlôjian' ny olombelona dia fandraisana sy fahatsapan' ny atidoha ny onja toy izany ny feo.
![](http://upload.wikimedia.org/wikipedia/commons/thumb/8/82/Spherical_pressure_waves.gif/220px-Spherical_pressure_waves.gif)
Ny onjam-peo manana hatetika eo anelanelan' ny 20 Hz sy 20 kHz eo ho eo ihany (fari-pahatetehan' ny feo) no afaka manaitra ny fahatsapana ao amin' ny olombelona. Ao amin' ny rivotra sy amin' ny tsindrin' ny atmôsfera dia maneho onjam-peo manana halava 17 m hatramin' ny 1,7 sm ireo hatetika ireo. Tsy henon' ny olombelona ny onjam-peo mihoatra ny 20 kHz sy onjam-peo eo ambanin' ny 20 Hz. Samy manana ny fiheban-katetika samihafa ahafahany mihaino feo ny karazam-biby samihafa.