Bazalta

Ny bazalta na vatongaly dia vato magmatika avy amin' ny volkano, vokatry ny magmà mihamangatsiaka haingana ary miavaka noho ny firafitra mineralôjikany: plajiôklazy (50 %), pirôksena (25 hatramin' ny 40 %), ôlivina (10 hatramin' ny 25 %), ary 2 hatramin' ny 3 % manetita. Eto amin' ny Tany dia avy amin' ny volkano ny bazalta ary anisan' ny singa fototra amin' ny hodin-tany ambany ranomasina. Eny amin' ny Volana, ny bazalta no mandrafitra ny velaran' ny faritra maizina ("ranomasim-bolana"). Izy dia singa manan-danja amin' ny hoditry ny planeta Marsa sy Venosy ary Merkiora.

Bazalta na vatongaly

Ny bazalta dia vato melanôkrata mankany hôlômelanôkrata (maizina hatramin' ny tena maizina) manana firafitra mikrôlitika, avy amin' ny fitsonika ampahany amin' ny akanjon-tany misy peridôtitika (lerzôlita).

Ny fivoahan' ny bazalta ety ivelany lehibe indrindra fantatra dia ny Tohatohatr' i Siberia (Rosia), ny Tohatohatr' i Deccan any India, ny Lembalemban' i Kôlômbia any Etazonia, ny tangoron-tendrombohitra Tassili n'Ajjer any Alzeria ary ny ranom-bolokano triasika any Amerika Avaratra. Ny rafitra bazaltika malaza indrindra angamba dia ny Clochán an Aifir any Irlandy, izay ahitana ny "orga" bazaltika (miendrika tsanganana, matetika enin-dafy). Any Frantsa dia hita azy io indrindra ao amin' ny Massif Central. Ny faritra maizina amin' ny Volana ("ranomasim-bolana") dia niforona amin' ny alalan' ny bazalta.