Ambondrombe

Ambondrombe
Sary:Ambondrombe.jpg
Velarantany	NC
Tanàn-dehibe	NC
Ben'ny tanàna	NC
Firenena	NC
Fanjakana	NC
Faritany	NC
Tanàna mifanolo-bodirindrina	NC

Ambondrombe dia tendrombohitra mirefy 2 172 m ambonin' ny haabon' ny ranomasina, ao amin' ny faritra Matsiatra Ambony, ao amin' ny distrikan' Ambalavao, izay toerana masina eto Madagasikara, araka ny finoana sy fomban-drazana malagasy, amin' ny maha toeram-pialofana ara-panahy ho an' ny ambiroan' ny maty azy. Manan-danja ara-jeôgrafia sy ara-kolontsaina koa io toerana io. Ny tantaran' Ambondrombe dia voamariky ny ozona sy ny finoana ary ny fifandraisana amin' ny zavaboary.

Jeôgrafia

Ambondrombe dia tendrombohitra mirefy 2 172 m ambonin' ny haabon' ny ranomasina, ao amin' ny distrikan' Ambalavao, ao amin' ny faritra Matsiatra Ambony, ao amin' ny faritanin' i Fianarantsoa. Tokony 40 km ao atsinanan' Ambalavao, amin' ny lalana mankany Ikongo, ity tendrombohitra avo ity. Eo amin' ny roa andro eo no faharetan' ny dia an-tongotra miala eo Ambalavao mankany Ambondrombe. Saron-javona lava izy io, ka tsy hita mihitsy ny tampony raha avy aty ivelany.

Rakotra ala mikitroka ny ampahany be amin' Ambondrombe ankehitriny. Toerana arovana izy noho ny fisian' ny ala sy ny karazam-biby sy karazan-javamaniry maro ao aminy. Manana anjara toerana eo amin' ny fizahan-tany sy ny fiompiana sy ary ny fambolena koa izy noho ny fisian' ny renirano efatra lehibe mipoitra avy aminy: i Mananatanana (sakelidranon' i Mangoky), i Sandranata, i Matitanana, ary i Sahandrato.

Tantara sy fiavian' ny anarana

Ny Vazimba sy ny Dimanga no nonina teny Ambondrombe fahiny.

Ny anarana hoe Iratsy

Ny mpanjaka Ivasiafotsy

Araka ny fitantarana dia nipetraka tao Ambondrombe ny mpanjaka antsoina hoe Ivasiafotsy, avy any Imoro, any atsinanana. niaraka amin' ny mpanara-dia azy sy ombiasy atemoro anakara. Rehefa afaka kelikely taty aoriana anefa dia nahatsikaritra setroka avy any Imoro izy, izay tsy tiany satria ninoany fa atahorana handrava ny ala ny afo. Izany no nahatonga azy hiteny hoe: "Tsy te hitoetra eto aho fa ratsy ity tanàna ity". Nanomboka teo ny laza ratsin' Ambondrombe.

Raotovolamena

Atao hoe Iratsy koa ny anaran' Ambondrombe. Araka ny fitantarana dia nisy mpanjaka atao hoe Randriamitelimbolamena sy ny vadiny sy Raongivolamena izay nanorim-ponenana teo amin' io vohitra io. Nanan-janaka vavy izy ireo, dia Raotovolamena. Misy ranovory ny eo amin' ny ilany atsimo-atsinanana an-tampon' io tendrombohitra io, izay naniriana vondrona maro dia maro. Very tao amin' ireo vondrona ireo ilay zanaka vavan' ny mpanjaka. Nanontaniana ny anakandriamahalala (mpimasy) teny Ampitarafa. Mila mamono omby mainty ny mpanjaka ary arotsaka ao amin' ilay ranovory ny ran' omby. Tsy nipoitra anefa Raotovolamena. Tsy zakan' ilay andriambavy ny tsy fahitana an-janany ka nanozona izy fa vohitra ratsy io vohitra io: izay no nahatonga an' Ambondrombe hantsoina koa hoe Iratsy. Noho ny alahelony an-janany hipetra-drery eny Ambondrombe na Iratsy, dia nanozona Raongivolamena fa ny avelon' ny olona rehetra izay mahatazana io vohitra io dia tsy maintsy mandalo eny avokoa.

Ny anarana noe Ambondrombe

Radama I sy ny tafika nentiny

Atao hoe Ambondrombe io toerana io, hoy Michel Randria, satria any no fivoriam-be na fonenana iombonan' ny rehetra any an-koatra rahatrizay maty ka miala eto an-tany. "Lasa vahoakan' Ambondrombe" no fiteny tranainy indrindra raha nilaza ny olona nody mandry ny Gasy,fa tsy "lasan' Andriamanitra" na "nantsoin' ny Ray hody any aminy". Nanafika tany atsimo Radama I, dia maty indrindra teo Ambondrombe ny ankamaroan' ny miaramila anjatony niaraka aminy. Rehefa tafaverina ny sisa velona dia nilaza fa mbola hihaona amin' ny havany any Ambondrombe izy ireo rahatrizay, izany no nolazainy ho fampiononana ny havan' ny maty.

Finoana

Araka ny finoana dia mankany Ambondrombe ny fanahy na ambiroa rehefa maty. Na andro na alina dia andrenesana feon' olona, ​​akoho maneno, dobok' amponga, feon-tsodina, omby mitrena, vehivavy mitoto vary, horakoraka maro samihafa, tomanin-jaza, ary tafondro sy basy mipoahaka ny eny, hoy ny mponina manodidina. Misy koa ny fambara, toy ny tomany, heno eny Ambondrombe, izay manambara tranga toy ny fahafatesana ao amin' ny tanàna manodidina.

Mba hahatongavan' ny ambiroan' ny olona haingana any Ambondrombe dia asian' ny fianakaviana vola vy ny ao ambavan' ny razana. Iny vola iny no omen' ny ambiroan' ilay razana ny ambiroan' ny borizany sy ny an' ny andevo mifanena aminy mba hitondra azy any.

Misy mpiandry vavahady ny eny, izay mitazona ny fanalahidin' Ambondrombe sy mandray ny ambiroa rehetra. Mivahiny telo taona ao ny ambiroa vao izay lasa etona ka mifangaro amin' ny zavona manarona an' Ambondrombe. Misy rihana telo ny zavon' Ambondrombe. Mivahiny taona iray isaky rihana ny ambiroa. Afaka mirenireny etsy sy eroa, mitsidika ny fianakaviany (amin' ny alalan' ny tsindrimandry) na ny fasana nandevenana ny vatany, ny ambiroa mandra-pahavitan' ny fivahinianana telo taona.

Jereo koa

• Ambohimahamasina