Sakan' i Pallas
Ny sakan' i Pallas na manola na sakam-patrana (Otocolobus manul na Felis manul) dia biby iray sokajy amin’ ny saka, ao amin' ny zana-pianakavian' ny Felinae. Io no hany karazana ao amin' ny sokajy Otocolobus.
Manana vatana matevina sy fonentana sy tongotra fohy ary rambo fohy sy matevina ny manola. Ny volony, tena lava sy matevina, dia mahatonga azy ho toa lehibe kokoa noho ny tena izy. Ny singam-bolony eo amin' ny faritra ambany (amin’ ny kibony, ao anatiny amin’ ny tongotra ary amin’ ny rambony) dia saika lava kokoa avo roa heny noho ny eo amin' ny takibany na ny lamosiny, izay ahafahany mandady mikasika amin’ ny tany rehefa mihaza izy sady voaaro amin' ny hatsiaky ny ririnina.
Ny sakan' i Pallas dia miforitra amin' ny rambony rehefa mandry, izany fomba fandriany izany no ahafahany mitazona ny hafanan' ny vatany. Raha any avaratra amin’ ny faritra misy azy izy dia miloko volondavenona ny volony, fa menapina kosa raha any atsimo. Mety miovaova arakaraka ny fizaràn-taona ny lokony. Amin’ ny karazany sasany dia misy tsipitsipika mainty mitsangana eo amin' ny takibany. Fotsy ny tendron' ny volony ka manome endrika manopy volafotsy. Fotsy ny saokany sy ny tratrany ary ny kibony. Ny tongony dia misy soritra mainty tsy miavaka. Ny rambony mainty tendro sady toy ny misy kivango miloko mainty miisa fito ka hatramin' ny sivy. Ahafahany miafina tsara ao anaty tontolo voajanahary misy azy ny lokon'ny volo amin’ ny hodiny amin’ ny ankapobeny.
Ny halavan’ ny manola dia eo anelanelan' ny 50 sy 65 sm ary mirefy 21 hatramin'ny 31 sm ny rambony. Ny haavony dia 28 hatramin'ny 30 sm. Miovaova eo amin'ny 2,5 ka hatramin'ny 4,5 kg ny salan-danjany. Amin' ny ankapobeny dia mavesatra noho ny vavy ny lahy.
Fisaka sy lehibe ny lohany. Fohy sy boribory ary mipetaka ambany eo amin' ny lohany: zara raha mihoatra avy amin' ny volony. Ny lohany izay somary midina ambany dia mety tsara amin'ny fihazana amin' ny faritra malalaka tsy dia misy zavamaniry firy. Ny hakelin' ny sofiny dia misoroka ny fahaverezan’ ny hafanana be loatra. Misy pentipentina mainty kely ny handriny. Misy tsipitsipika maloka sy fotsy ny takolany.
Fotsy ny volom-bavany ary ny masony dia misy sisiny fotsy sy mainty. Ny manola koa dia manana hodimaso fahatelo izay miaro ny masony amin' ny rivotra mangatsiaka sy ny tafio-drivotra feno vovoka. Boribory ny anakandriamansony ary kely kokoa ny valanoranony raha mitaha amin’ ny an' ny karazan-tsakabe hafa.
Ny sakan’ i Pallas dia miely amin’ny faritra midadasika, miankandrefana mankany amin' ny Ranomasina Kaspiana ary any atsinanana hatrany andrefana amin' i Sina tany am-boalohany. Miitatra mianavaratra mankany Môngôlia sy Kazakstàna ary Rosia ny faritra ary mianatsimo hatrany Iràna sy Pakistàna ary Nepaly. Hita indrindra any Môngôlia izy, ary tsy dia fhita matetika any Tibeta, any Afganistàna ary any Pakistàna. Tsy misy intsony any atsinanana amin' i Sina izy. Sambany tamin' ny taona 2014 no voamarina ny fisiany ao Nepaly, ao amin' ny distrikan' i Dolpa no misy ny fetra andrefana amin' ny faritra misy azy any Nepaly.